Gedurende haar inhuldiging as derde kanselier van die NWU op 20 November by Feather Hill in Potchefstroom, was die atmosfeer vol opgewondenheid en afwagting.

 

Die aand het aan alle verwagtinge voldoen. Elegante eetgerei wat in die kerslig glim, en die aroma van goeie kos en wyn het die sintuie behoorlik bederf. Later, toe die akademiese prosessie in hul NWU-regalia die lokaal binnekom, het hulle ’n ekstra tikkie “ivy league”-glans bygevoeg.

 

Word raakgesien en lewer diens

 

Dr Mokgokong sê om as kanselier te dien, is ’n roeping.

 

“My mantra is: ‘Steek jou hand op, word raakgesien en erken.’ Dit is vir my ’n roeping tot gemeenskapsdiens waaraan ek my lewe gewy het.”Sy is baie opgewonde oor die volgende hoofstuk in die geskiedenis van die universiteit. “Ek glo dat diens aan die hoëronderwyssektor van ons land ’n geweldige, edele taak is, en dat dit ook ’n diens van hoop is.

 

“Ek het hierdie benoeming aanvaar terwyl ek heeltemal bewus is van die uitdagings wat nie net hierdie instelling nie, maar ook hoëronderwysinstellings nasionaal en internasionaal, in die gesig staar.”

Sy glo maatskaplike geregtigheid gaan daaroor om toegang tot gehalte-onderwys te verskaf soos dit in die Grondwet verskans is.

 

“Dit is my uitdruklike wens dat die NWU as proaktief sal wees in die opstelling van ’n agenda vir maatskaplike probleme, eerder as om slegs op die probleme te reageer.”

 

Eerste vroulike kanselier

 

Dr Bismark Tyobeka, voorsitter van die NWU-Raad, sê die inhuldiging van dr Mokgokong as die heel eerste vroulike kanselier van die universiteit versterk die universiteit se strewe om ’n bastion van gelykheid te wees.

 

Hy sê haar indrukwekkende resumé en bewese prestasierekord getuig van ’n onbuigsame toewyding aan uitnemendheid. “Dit stem ooreen met die inherente dryfkrag van ons instelling.”

 

Dr Mokgokong volg in die voetspore van Kgosi Leruo Molotlegi, koning van die Koninklike Bafokeng-nasie, en dr Popo Molefe, voormalige premier van Noordwes.