Wanneer ’n mens na die leerders van die Suncrest Hoërskool in Vanderbijlpark luister, word dit duidelik dat hulle onderwyser, Nikiwe Mgwigwi, ’n besondere positiewe impak op hulle lewens het.

Nog ’n onderwyser wat ’n impak op haar leerders gehad het, is Bill Gates se laerskoolonderwyser, Blanche Caffiere. In ’n onlangse onderhoud het die medestigter van Microsoft en Amerikaanse besigheidsmagnaat haar geloof vir die “geweldige” impak wat sy op sy lewe gehad het.

 

Soos Blanche en ander toegewyde lede van hulle professie, motiveer en inspireer Nikiwe ook die volgende generasie.

 

Die 29-jarige Nikiwe is ’n trotse alumna van die NWU se kampus in Vanderbijlpark, en volgens die Departement van Basiese Onderwys die beste hoërskoolonderwyser in Suid-Afrika.Nikiwe se passie vir onderwys is tydens die 2017 Nasionale Onderwystoekennings met die hoogste toekenning in die kategorie: Uitnemendheid in Sekondêre Onderwys bekroon.

 

“Ek kan my nie indink om nie ’n onderwyser te wees nie.”

 

Volgens Nikiwe – wat wiskundige geletterdheid onderrig – is haar liefde vir die onderwys en haar hoë agting vir die professie deur haar hoërskoolonderwysers aangewakker.

 

“Ek skryf my persoonlike en professionele groei aan my onderwysers toe, en veral een van hulle wat my aangemoedig het om deur te druk, al was die pad nie altyd maklik nie,” onthou Nikiwe, wat instinktief geweet het dat onderwys ook haar roeping sou wees.

 

Sy het haar loopbaan in 2010 by die Suncrest Hoërskool begin terwyl sy nog met haar finale studiejaar besig was. Sy het in 2015 by die skool se bestuurspan aangesluit en is as die departementshoof vir wiskunde en wiskundige geletterdheid aangestel. Sy is ook die mentor vir graad 10 en verantwoordelik vir alle sake wat met dissipline, ouers se navrae, en mentorskap verband hou.

Gedurende haar loopbaan by Suncrest Hoërskool het Nikiwe reeds verskeie toekennings en vermeldings vir haar werk ontvang.Hierdie prestasies sluit in ’n 100%-slaagsyfer in die Nasionale Senior Sertifikaat-eksamen (NSS-eksamen), ’n eerste plek in die Sedibeng Onderwysdistriktoekennings, ’n uitnemendheidstoekenning van die Gautengse LUR vir Onderwys, en ’n Goue Prestasie-toekenning van die Minister van Basiese Onderwys, Angie Motshekga.

Nikiwe motiveer nie net leerders in haar klaskamer nie, maar ook leerders van skole in die gemeenskap wat onderpresteer. Deur die skool se Sekondêre Skool-intervensieprogramme onderrig sy oor naweke en tydens skoolvakansies leerders in wiskundige geletterdheid.

As ’n mens na Nikiwe se loopbaan kyk, is dit baie waarskynlik dat haar leerders haar eendag sal onthou as daardie spesiale onderwyser wat hulle geïnspireer het soos haar eie onderwyser haar geïnspireer het, en Bill Gates se onderwyser vir hom. En wie weet: dalk sal Nikiwe se klaskamer die volgende Bill Gates oplewer.

* Die  Nasionale Onderwystoekenningstelsel wat in 2000 ingestel is, is reeds 17 jaar lank aan die gang. Deur hierdie inisiatief erken die Departement van Basiese Onderwys die buitengewone pogings wat onderwysers maak, dikwels onder moeilike omstandighede.