“Wetenskap speel ’n betekenisvolle rol in die manier waarop ons ons daaglikse lewens leef. Selfs nog interessanter is hoe die wetenskap ons teen wetenskaplike rampe, soos asteroïed-aanvalle en meteoorreëns, beskerm. Dit is waarom ek die wetenskap so interessant vind,” sê Olorato.

 

Hy is in Mahikeng gebore en het daar grootgeword en sy basiese onderwys by die plaaslike Sol Plaatje Laerskool ontvang, waarna hy sy skoolopleiding aan die Internasionale Skool van Suid-Afrika voltooi het.

 

Die NWU se kampus in Mahikeng was die logiese keuse vir die volgende fase van sy opleiding.Nadat hy sy voorgraadse studies in rekenaarwetenskap en elektronika (met wiskunde, fisika en rekenaarwetenskap as hoofvakke) voltooi het, het Olorato sy honneursgraad in astronomie en astrofisika deur middel van die Universiteit van Kaapstad se Nasionale Astrofisika en Ruimtewetenskap-program voltooi.

 

Opkomende ster

 

Hy is nou terug by die NWU vir sy meestersgraadstudies in ruimtewetenskap as deel van die Suid-Afrikaanse graadprogram vir die Vierkantkilometeropstelling (SKA).

 

Olorato het in Januarie 2016 die geleentheid gekry om as een van 11 rekrute van die Jong Professionele Persone-ontwikkelingsprogram by die projek aan te sluit.

 

Hy is daarna as een van slegs drie gegradueerdes van Suid-Afrika gekies om vir ses weke lank die NASA Frontier Development Laboratorium in San Francisco te besoek.Hierdie geleentheid het beteken dat hy en 12 ander persone die geleentheid gekry het om saam met akademiese en bedryfsvennote aan NASA se Asteroid Grand Challenge te werk.

 

“Om die SKA-projek in ons agterplaas te hê, is wonderlik, maar dit is regtig iets besonders dat ons jong wetenskaplikes in die Verenigde State by NASA kan opgelei kan word sodat hulle daardie kennis terug huis toe kan bring,” sê Olorato.

 

Wanneer hy nie van ruimteverkenning en wetenskapontwikkelings droom nie, geniet hy dit om na musiek te luister en by vriende te kuier.

 

As julle dalk wonder, Olorato se fassinering met die beskerming van die planeet van asteroïed-aanvalle het niks met John Green se internasionale blitsverkoper, The Fault in our Stars te doen nie. Hy mag dalk sterre in sy oë hê, maar sy belangstelling is pure wetenskap.