Dr Sammy Thekiso is die voorsitter van die NWU se Konvokasie.Dit is die mening van dr Sammy Thekiso, voorsitter van die NWU se Konvokasie, wat vas glo dat om met jou alma mater in kontak te bly, jou én die universiteit bevoordeel.

Die NWU & U het met hom gepraat oor die vestiging van wedersyds voordelige verhoudings tussen alumni en die universiteit.

Eerstens, hoe kan ek as ’n alumnus daarby baat om met die NWU in kontak te bly?

Een van die eerste voordele waaraan ’n mens kan dink is netwerking. Ons weet almal hoe belangrik dit deesdae vir die bevordering van jou loopbaan is om op ’n uitgebreide professionele netwerk staat te maak. As alumnus kry jy die geleentheid om deel te wees van ’n wêreldwye netwerk van NWU-alumni wat jou opvoedkundige agtergrond deel, en heel waarskynlik ook jou basiese waardestelsels en werksetiek – alles waardevolle voordele wat deur ’n opvoeding aan die NWU verkry is.

Al jou mede-alumni kan vir jou ’n aanwins wees. Jy kan vir ouer lede loopbaanadvies vra en hulle netwerke vir bevorderingsmoontlikhede benut, terwyl jonger alumni met wie jy kontak het vir jou ’n bron van toekomstige werknemers of kollegas kan wees.

Deur in kontak met die universiteit self te bly, kry jy die geleentheid om die geriewe en kundigheid van die instelling vir jou professionele lewe te gebruik – byvoorbeeld deur navorsingsresultate aan te wend om jou besigheid te help groei. Dit stel ons ook in staat om jou oor die belangrike ontwikkelinge en prestasies van die NWU ingelig te hou.”

Hoe kan ek betrokke raak?

Daar is twee hoofkanale beskikbaar – die alumnivereniging en die Konvokasie.

Kom ons praat eers oor die Konvokasie. Dit is ’n formele struktuur wat die welstand van die universiteit bevorder en deur verteenwoordiging op die NWU Raad sy sake aktief beïnvloed. Dit bestaan uit voormalige studente (alumni) wat ’n graad of diploma aan die NWU of sy voorgangers verwerf het, asook al die huidige permanente personeellede van die universiteit.

Jy kan ’n lid word deur formeel vir lidmaatskap aansoek te doen en die voorgeskrewe R50 vir lewenslange lidmaatskap te betaal. Klik hier vir meer inligting oor lidmaatskap en die aansoekvorm.

En die alumnivereniging?

Die NWU-alumnivereniging is ’n tak van die Konvokasie en bevorder lewenslange skakels tussen alumni en die universiteit.

Elkeen wat ’n diploma of graad by die NWU (of sy voorgangers) verwerf het, kan ’n lid van die alumnivereniging word. Die gades van alumni, asook individuele donateurs wat nie aan die NWU studeer het nie, kan assosiaatlede met dieselfde regte en voorregte as ander lede word.