Die naweek van 21 tot 23 Julie het op ʼn hoë noot afgeskop toe De Wilgers se Timmies-rugbyspan die Vrydag met 24-21 oor Ratau se eerste span geseëvier het. Daardie aand het die alumni stories – die een erger as die ander – oor hulle universiteitsdae vertel terwyl hulle om die vuur in die koshuis se boma gekuier het.

Saterdag het almal by ʼn toer deur die universiteit se argief aangesluit, waarna die manne saam rugby gekyk het. Tydens die aand se funksie het prof Hendré Reyneke en prof Hans de Ridder, albei voormalige koshuisvaders, saam met oud-HK-lede met die alumni gesels.

Die huidige koshuisvader, Dries Marais, het Sondagoggend ná ontbyt ʼn spreekbeurt gekry voordat die alumni die pad huis toe aangedurf het.

Kuier in die Laeveld

’n Week later was dit pure Laeveld-lekkerte toe NWU-vriende op 28 Julie 2017 by Umbali in Nelspruit (Mbombela) bymekaargekom het.

Ongeveer 50 gaste, insluitende alumni, ouers van huidige studente en ander vriende van die NWU, het trotse NWU-bande gevier en versterk.

Benewens die kuier het hulle ook geluister na prof Fika Janse van Rensburg, die adjunk-visekanselier op die NWU se kampus in Potchefstroom, wat vir hulle vertel het hoe dit by die universiteit gaan.