Eers het MBA-alumni op 7 Junie 2017 by die Leopard Park Golf Estate in Mahikeng bymekaargekom. Een van die hoofonderwerpe wat hulle tydens die byeenkoms bespreek het, was die belangrikheid om iets aan die universiteit terug te gee en die verskillende maniere om dit te doen. Dit sluit byvoorbeeld in om fondse in te samel vir die Meal-a-Day-projek wat studente van ten minste een gesonde maaltyd per dag voorsien.

By die byeenkoms het alumni ook besluit om aan ander MBA-alumni te skryf en te beklemtoon hoe belangrik die rol is wat hulle in die ondersteuning van hul alma mater kan speel.

Positiewe gesindheid onder die Bloemfontein-alumni

Daarna, op 23 Junie, het Warren Makgowe, die direkteur vir belanghebberverhoudinge, en Susan van Rooyen, alumniverhoudinge-praktisyn, ’n alumnibyeenkoms en dinee by die Protea Hotel in Brandwag, Bloemfontein bygewoon.

Hulle het gehoor dat die alumni entoesiasties was om ’n afdeling in daardie stad te stig met die doel om as ’n skakel tussen hulle en die universiteit te funksioneer.

Tydens die vergadering het NWU-personeel die alumni ingelig oor die jongste ontwikkelinge by die universiteit en die uitdagings wat die kampus in Mahikeng in die gesig staar. Alumni is ook gevra om hul ervarings van die werkplek te deel, en te vertel wat hulle bereik het sedert hulle aan die NWU gegradueer het.

’n Bespreking oor fondsinsameling het ook positiewe reaksie by die alumni uitgelok.

Alumnus praat met vroue vanuit ’n man se perspektief

Alumnus Thato Mashishi, ’n 25 jaar oue kandidaatprokureur by die regsfirma Fasken Martineau, het op 26 Augustus 2017 met vroulike studente gepraat. Dit was tydens ’n funksie wat deur die Koshuisraad van 2017 in vennootskap met die Mahikeng-afdeling van die Golden Key International Honour Society georganiseer is.

Thato, ook ’n Golden Key-lid, het ’n man se perspektief gegee oor die rol van vroue in leierskap onder die tema: “Wees bewus van jou waarde”.