Onthou die naam Betty Mahlatsi. Hierdie 28-jarige alumna van die NWU se kampus in Vanderbijlpark het haar oog op sukses, en as haar professionele pad tot dusver enige aanduiding is, is sy op pad na iets groots.

Betty, ’n talent- en leierskapsontwikkelingskoördineerder by Transnet Spoorvrag, is onlangs geloof as die Instituut van Mensebestuur (IMB) se opkomende praktisyn van die jaar vir 2016.

 

Die jaarlikse IMB-toekennings gee erkenning aan innoverende en bekwame leiers in die mensehulpbron- (MH-) asook die algemene sakegemeenskap. As die IMB se opkomende praktisyn van die jaar het Betty duisende jong mensehulpbronpraktisyns (MH-praktisyns) regoor bedrywe by die luisterryke jaarlikse konferensie van die IMB stof in die oë geskop.

 

Terwyl sy op die NWU se kampus in Vanderbijlpark studeer het, het Betty ’n BCom-graad in mensehulpbronbestuur verwerf, wat sy in 2010 met ’n nagraadse onderwyssertifikaat opgevolg het.

Sy het haar loopbaan met ʼn internskap by Transnet begin en het van die begin af haarself onderskei.Volgens Tumelo Mokwena, die hoofbestuurder vir mensekapitaal by Transnet Spoorvrag, maak Betty se nuuskierigheid, inisiatief en energieke houding haar ’n uiters waardevolle MH-praktisyn. “Betty skram nooit van ’n uitdaging weg nie,” sê Tumelo.

Passie, dryfkrag, motivering, geesdrif… noem dit wat jy wil, dit is ’n selfgedrewe houding wat jou op die pad van sukses in jou loopbaan sal lei.

Passievol oor mense

“Ek is passievol oor die ontwikkeling van mense," sê Betty en skryf haar resultaat-gedrewe werksetos aan haar aanpasbaarheid en fokus toe.

In haar daaglikse werksomgewing bied Betty werkswinkels en adviessessies aan vir lynbestuurders en werknemers ten opsigte van leierskapsontwikkelingsintervensies en -prosesse. Sy fasiliteer ook talentbestuursopleiding op verskillende vlakke en ook verteenwoordig Transnet Spoorvrag by verskeie loopbaan- en vaardigheidsontwikkelinguitstallings.

Op die walle van die Vaalrivier

Betty het in 2007 by die NWU ingeskryf nadat sy haar hoërskoolopleiding by die Ed-U-College in Vereeniging voltooi het. As lid van die Acacia-dagkoshuis het Betty ’n aktiewe studentelewe geniet en verskeie studenteleierskapsposisies beklee.

Sy het as tesourier en transformasiebeampte, onderprimaria en primaria van Acacia gedien, asook ’n termyn as kuns-en-kultuurbeampte van die Verteenwoordigende Studenteraad.

Toe sy gevra is wat haar beste herinneringe as student was, het Betty gelag en gesê die interaksie en kameraderie tussen Acacia en Oryx (’n mansdagkoshuis) was “legendaries”. Wanneer sy nou die kampus besoek, tref die talle infrastruktuurontwikkelinge haar.

“Dit was altyd vir my pragtig, maar hierdie ontwikkelings maak dit net nog wonderliker,” sê sy.

Wat die toekoms betref, voorsien Betty dat sy binne die volgende vyf jaar haar meestersgraad sal voltooi, en as sy nie ’n groot leierskapsrol beklee nie, sal sy aan die stuur van haar eie onderneming wees.

“Ek het só baie by die NWU geleer en sal vir ewig dankbaar wees vir die lesse en geleenthede wat na my kant toe gekom het.”