Bernard Krüger, alumnus van die NWU en befaamde musiekdirekteur van die Drakensbergse Seunskoor, stem heelhartig saam met Plato. Hy sê die rykdom van koorsang koester interkulturele welwillendheid soos geen ander intervensie in die samelewing nie.

 

En Bernard behoort te weet.

 

As musiekdirekteur speel hy ’n belangrike rol in die vorming van die seuns wat die Drakensbergse Seunskoor hul tuiste noem. Hulle word van regoor die land gekeur en kom van verskillende kulturele en sosio-ekonomiese agtergronde.

 

Bernard en die koor maak saam musiek tot vreugde van gehore regoor die wêreld.

 

Kampioen van die Wêreldkoorspele

 

Dit was hierdie jaar die 10de verjaardag van die hoogaangeskrewe Wêreldkoorspele en dit is vir die eerste keer op die Afrika-vasteland aangebied.

 

Getrou aan die geskiedkundige aard van die spele is Suid-Afrika as die kampioene gekroon nadat hulle ’n totaal van 78 medaljes verower het. Hiervan het twee goue medaljes aan die Drakensbergse Seunskoor behoort. Hulle het goud in die Kampioenkompetisie gewen met hul uitvoering van Abba se “Does Your Mother Know?” en ook in die Scenic Pop-kampioenkompetisie.

 

Bernard, wat in 2016 by die koor aangesluit het, sê die seuns het drie ander liedjies vir hul kompetisiereeks uitgevoer: “Feel it Still” (Portugal, The Man), “Now we are free” (temalied van die film Gladiator) en “The Wrong Note Rag” (Leon Bernstein, uit Wonderful Town).

 

Met ’n telling van 89,38 het die Drakensbergse Seunskoor tweede in die kinderkoorafdeling geëindig, net 1,6 punte agter die Tygerberg Kinderkoor.

 

Wat ’n debuut

 

“Toe ons vir die kompetisie ingeskryf het, het ons beslis vir die hoogste moontlike uitslag gemik, maar ek het eerlikwaar nie gedink dat ons sou wen nie,” sê Bernard. Hy voeg by dat dit in die 51 jaar lange geskiedenis van die koor hul debuutoptrede in hierdie gesogte kompetisie was.

 

Toe hy gevra is hoe hy oor die koor se buitengewone prestasie voel, het Bernard gesê hy is verheug, veral ter wille van die seuns.

“Ek het net my werk gedoen – musiek gemaak en mense vermaak. Vir die seuns was dit ’n suiwerende oomblik; maande se harde werk het ʼn hoogtepunt bereik tydens die 15 minute op die verhoog.” In sy aanvaardingstoespraak het Bernard gesê musiek kan jou na enige plek neem, en om saam te sing, bring nasies byeen.

 

Gee alles

 

Sukses word egter nie sonder opoffering en harde werk behaal nie. In die maande voor die kompetisie het die koor ’n veeleisende repetisieskedule gehad. Verskeie motiveringsprekers het tot die koor se sielkundige voorbereiding bygedra.

 

Trouens, Bernard lag en sê die hele skool was op ’n dosis immuniteitstablette, vitamines en aanvullers. “Daar was baie op die spel omdat ons geweet het daar sou baie druk en verwagtinge van die publiek wees.”

 

Het jy geweet?

 

•  300 kore van 59 lande het aan die Wêreldkoorspele deelgeneem.
• China het in die tweede plek geëindig met 25 medaljes, Rusland in die derde plek met 17 medaljes, en die Verenigde State in die vierde plek met 15 medaljes.
• Die Drakensberg Old Boys se koor, wat deur Herman Swanepoel afgerig word, het die goue medalje in die Mans Kamerkoor-afdeling gewen.