Die Fakulteit Regte, in vennootskap met die Suid-Afrikaanse regsuitgewers Juta, het die jaarlikse skynverhoorkompetisie op 17 en 18 Augustus by die Mahikengse Hoë Hof aangebied.

 

Die lede van die wenspan is die tweedejaar-regstudente Orabile Boikanyo, Gugu Msomi, Teboho Madibo en Karabo Dikhuba. Hulle het die wet behoorlik uitgelê vir die ander sewe groepe van tweede- en derdejaarstudente van die drie NWU-kampusse wat die semifinale van die kompetisie gehaal het.

 

Stel 'n goeie saak

 

Die Mahikeng-span, wat vir die verdediging verskyn het, het hulle oorwinning verseker deur twyfel te skep oor die gebeure soos ’n staatsgetuie dit beskryf het. Sy het beweer sy is aangerand toe haar man haar ná ’n nag van drinkery geslaan het.

 

Yudians Phoku, Simbongile Siyali en Danny Hlapolosa, derdejaarstudente van die kampus in Potchefstroom, het in die finale rondte vir die staat verskyn.

 

Die Juta Skynverhore-kompetisie is die geesteskind van advokaat René Koraan, dosent in die Fakulteit Regte op die kampus in Potchefstroom. Sy beskou dit as ’n geleentheid vir tweede- en derdejaarstudente om broodnodige hofervaring op te doen.

 

Bly aan die regte kant van die reg

 

Prof Stephen de la Harpe, uitvoerende dekaan van die Fakulteit Regte, sê meer as 300 studente regoor die kampusse het hierdie jaar vir die kompetisie geregistreer.

 

“Dis ’n geleentheid om ’n passie vir die reg te kweek en studente van al die kampusse byeen te bring.”Nadat die wenners aangekondig is, het die voorsittende beampte en regter van die Hoë Hof, Tebogo Djaje, gesê dit was wonderlik dat studente só kon voorberei en hulle sake voor regters kon stel.

 

“Dit word dikwels slegs van praktiserende prokureurs verwag. Dit toon die gehalte van die onderrig wat hulle by die instelling ontvang, en ek hoop om te sien dat julle jongmense spoedig werklike sake in die howe sal bepleit.”