Ons alumni kan vir slegs R400 per jaar, plus ’n eenmalige betaling van R80 vir ’n toegangskaart, die NWU se biblioteke gebruik.

 

Om materiaal uit te neem of die ruimtes in die NWU se biblioteke te benut, moet jy die volgende stappe volg:

 

Vul die aansoekvorm vir eksterne lidmaatskap in wat jy hier kan kry, en handig dit by enige NWU-kampusbiblioteek in. (Harde kopieë van die vorms is ook by die biblioteke beskikbaar.) As dit gedurende kantoorure is, sal die biblioteekpersoneel die alumnikantoor kontak om jou status as alumnus te bevestig. (Jy kan ook jou akademiese rekord ingee as bewys dat jy ’n alumnus is.)

 

In plaas daarvan om na die biblioteek toe te gaan, kan jy ’n aanlyn vorm druk, dit onderteken en die geskandeerde vorm elektronies aan die biblioteek stuur. Hier is die e-posadresse:

 Mahikeng: Nomzingisi Madikane by nomzingisi.madikane@nwu.ac.zaPotchefstroom: Njabulo Makhathini by FPBLEEN@nwu.ac.zaVanderbijlpark: Tiny Moripa by VTCLOAN@nwu.ac.za 

Die biblioteekpersoneel sal dan jou status as ’n alumnus bevestig en vir jou die uitkoms laat weet.

 

Die volgende stap is om die jaarlikse registrasiegeld van R400 te betaal. Jy kan dit elektronies doen (die bankbesonderhede is op die aansoekvorm), of by die kassiere by een van die kampusbiblioteke. (Die biblioteke het ongelukkig nie kredietkaartgeriewe nie.)

 

Indien jy elektronies betaal, moet jy asseblief bewys van betaling indien. Sodra Finansies jou registrasiegeld aan die biblioteek toegewys het, sal toegang verleen word. Dit kan ’n paar dae duur.

 

Wanneer al die nodige verifikasie gedoen is, kan jy vir jou biblioteektoegangskaart aansoek doen. Dit is hoe jy dit doen: biblioteekpersoneel sal jou aansoek vir lidmaatskap goedkeur en dan kan jy tydens kantoorure die vorm by die kampus se beskermingsdienste indien sodat hulle teen ’n koste van R80 vir jou ’n biblioteektoegangskaart kan uitreik.

 

Toon jou toegangskaart by die biblioteek se sekuriteitstoonbank en gaan na die uitleentoonbank, waar jy op die biblioteekstelsel geregistreer sal word.

Jy kan jou veeldoelige kaart gebruik om toegang tot die biblioteek te kry en om boeke uit te neem. Onthou net: die kaart is nie oordraagbaar nie – jy is verantwoordelik vir die boeke wat daarop uitgeneem word.

 

Inligting met meer besonderhede oor spesifieke reëls en beperkings is op die aansoekvorm vir lidmaatskap beskikbaar.