Beste mede-alumni,

 

Ek het met opgewondenheid die artikel oor Ikateleng-projek gelees in die vorige uitgawe van die NWU & U wat aan my gestuur is.

 

Ek, prof Sakkie Steyn, het die projek wat Ikateleng voorafgegaan het 30 jaar gelede op die Vaaldriehoekkampus van die voormalige Potchefstroomse Universiteit vir Christelike Hoër Onderwys begin. Dit was toe bekend as die Saterdagskool.

 

Ons het in 1996 reeds 800 leerlinge uit die Vaaldriehoekgebied gehad, asook 'n skoolhoof en 23 onderwysers. Prof Tienie Theron was ’n mede-koordineerder van dié projek. Op Saterdae het 15 busse leerlinge van dwarsoor die Vaaldriehoek na die Saterdagskool vervoer en weer terug huis toe.

 

Ek het nog koerantberigte met foto’s oor die afskop van die Saterdagskool en ook oor die vordering van die projek. Trouens, ek het ʼn plakboek met al die koerantberigte oor Opvoedkunde se rol in die Vaaldriehoekgebied om benadeelde leerders by te staan. Dié berigte het tussen 1988 en 1996 in die Vaalweekblad verskyn.

 

 

Vriendelike groete,

 

Prof Sakkie Steyn

Dwarskersbos, Weskus

 

* In 1991 het die Saterdagskool ook op die Potchefstroomkampus begin, waar wyle Martiens Masiea die program Ikateleng genoem het, wat beteken om jouself te bemagtig.