Die sentrum is hoofsaaklik betrokke by navorsing in die mynbousektor, hoewel hulle ook al navorsing in die finansiële en kleinhandelsektor gedoen het en nie noodwendig navorsing in ander sektore uitsluit nie. Hierdie navorsing kan geweldig waardevol wees vir maatskappye wat hul KMV-beleide en -praktyke wil evalueer en verbeter.

Die sentrum is in die Sosiale Transformasie-fokusarea van die Fakulteit Lettere en Wysbegeerte gesetel en is die breinkind van wyle prof Freek Cronjé, die sentrum se eerste direkteur.

Sedert die deure vroeg in 2012 oopgemaak het, het hulle al menige opwindende projekte aangepak wat nie net navorsing en opleiding in die veld van KMV versterk nie, maar ook die klem op relevante en doeltreffende gemeenskapsbetrokkenheid plaas.

“Die Normeringsentrum is veral instrumenteel in plaaslike en internasionale bewusmaking van die omstandighede waarin myngemeenskappe hulle met betrekking tot mynboubedrywighede bevind,” sê Suzanne Reyneke, navorser.

Die nagraadse programme is belangrike komponente van die sentrum se akademiese aktiwiteite, wat 'n unieke meesters- en doktorale program insluit. Beide kwalifikasies is in ontwikkelingstudies met 'n KMV-kurrikulum. Die sentrum bied ook drie geakkrediteerde KMV-kortkursusse aan.

Die postdoktorale genoot, dr Ignatius Mariyadoss, sê die sentrum is bekend vir sy kundigheid. “Ek het by die sentrum betrokke geraak toe ek op die internet na KMV-kundiges gesoek het. Die Normeringsentrum vir KMV en prof Freek Cronjé was die eerste trefslae.”

Die projekte

Huidige navorsingsprojekte van die sentrum sluit in 'n Soweto-gesondheidsprojek, 'n evaluering van die Extractive Industries Transparency Initiative (EITI), en 'n inkomstedelingsprojek in die mynbousektor.

Die Soweto-gesondheidsprojek ondersoek die omstandighede van mense wat naby werkende of verlate myne woon. Die projek kyk ook na swak bestuurde mynboubedrywighede of myne in die Soweto-area wat wederregtelik verlaat is.

Die Normeringsentrum is besig met 'n kritiese evaluering van die EITI as deel van 'n ander projek. Die EITI is 'n vrywillige inisiatief met baie belanghebbers wat op die ekstraktiewe bedryf fokus, en sodoende die regering, industrie en burgerlike gemeenskap bymekaar bring.

Die nuutste projek gaan oor inkomstedeling in die Suid-Afrikaanse mynboukonteks en word deur die Open Society Foundation of South Africa befonds. Die doelwit van die projek is om die imperatief van inkomstedeling te definieer.

Inkomstedelingsinisiatiewe wat deur wetgewing afgedwing of geïmpliseer word, word noukeurig ondersoek. Die doel hiervan is om, met inagneming van internasionale beste praktyke, funksionele, lewensvatbare, volhoubare inkomstedelingsmodelle vir die Suid-Afrikaanse mynboubedryf aan te beveel.

Die toekoms blink

“Die sentrum het goed gevestigde verhoudings met die ander BRICS-lande (Brasilië, Rusland, Indië, China en Suid-Afrika) en die Suider-Afrikaanse Ontwikkelingsgemeenskap (SAOG),” sê prof Eddie Bain, senior navorser. “Ons het internasionale studente in ons M- en D-programme. Ons hoop dat hierdie internasionale verhoudings selfs verder sal uitbrei.”

Christine Knoetze, administratiewe beampte, sê die toekoms lyk rooskleurig en die sentrum se navorsingsplatform en meesters- en doktorale programme hou aan groei. Hulle sal ook voortgaan om geaffekteerde gemeenskappe deur hul navorsing te bereik.

Hoe alumni betrokke kan raak

Die sentrum maak staat op befondsing vir hul projekte en navorsing, en dit is waar alumni 'n rol kan speel. “Alumni kan projekte identifiseer en befonds en ons sal die navorsing namens hulle doen,” sê Eddie.

Suzanne sê die sentrum raadpleeg ook kundiges uit ander dissiplines en velde wanneer hulle aan projekte of akademiese publikasies werk. Vir meer inligting skakel Christine Knoetze, administratiewe beampte, by
018 285 2561.