“Ons glo dat dit net die begin van groot dinge en talle verdere ontwikkelings in elektroniese assessering by die NWU is.”

 

- Prof Herman van der Merwe

 

Gedurende die afgelope paar maande het die hoëronderwysbuurt twee nuwe intrekkers verwelkom – die een heet Aanlyn en sy ouer broer heet Die Vierde Rewolusie – en die NWU omarm albei.

Ja, ten spyte van verskeie uitdagings in 2020 wat met die Covid-19-pandemie verband hou, het die NWU verandering aanvaar en nuwe geleenthede benut. Dit het gelei tot verskeie mylpale wat in ons onderrig-leer-omgewing bereik is.

 

In hierdie artikel kyk ons na twee van hulle: die aanvaarding van ʼn aanlyn platform vir die assessering van studente en ook van ʼn geoutomatiseerde aanlyn stelsel wat die plasing van studente vir praktiese werk vereenvoudig. (Kyk tekskassies onder en regs vir laasgenoemde.)

 

Neem assessering van studente aanlyn

 

Dosente het op 1 Oktober amptelik begin om die nuwe Cirrus-e-assesseringsplatform te gebruik om hulle in staat te stel om studente in ’n aanlyn omgewing te assesseer. Dit volg ná ’n proses wat reeds meer as ’n jaar gelede begin het toe die NWU verskillende assesseringsplatforms ondersoek het wat plaaslik en internasionaal beskikbaar is.

 

Potensiële platforms is tydens die inperkingstyd ondersoek met die doel om teen Januarie 2022 die belowendste platform ten volle te integreer sodra dit aan al die universiteit se vereistes voldoen.

 

Wolkgebaseerde Cirrus loop oor van moontlikhede

 

Daar is gevind dat die Cirrus-platform die heel beste oplossing bied om aan die spesifieke onderrig-en-leer-vereistes van die NWU te voldoen.

 

“Dit maak aantekeninge deur die assessor moontlik, verskaf pasgemaakte nasiengeleenthede, gee ’n mate van assesseringsekuriteitsmonitering en ’n vlak van analitiese verslae van die student, asook ’n komplekse reeks assesseringsinstrumente,” sê prof Herman van der Merwe, die leier van die taakspan wat vir die implementering van die Cirrus-platform verantwoordelik is. Herman is die adjunkdekaan vir onderrig en leer in die Fakulteit Ekonomiese en Bestuurswetenskappe.

 

Dosente gee die groen lig

 

Terugvoer vanaf die personeel is tot dusver baie positief. Die nuwe platform bied verskeie voordele aan dosente, byvoorbeeld om met die druk van ’n knoppie analitiese data oor toetse en vraelyste te kan kry.

 

“Hulle kan nou ook numeriese en IT-vrae inkorporeer, iets wat voorheen moeilik was om in ’n aanlyn toets of eksamen te doen,” sê Herman.

 

Die nuwe platform sal aangepas word om seker te maak dat dit goed met die universiteit se stelsels integreer. Dit is nog ’n stap vir die NWU om die toekoms te betree en om die beste beskikbare tegnologie te gebruik om meer geleenthede vir personeel en ’n beter leerervaring vir studente te skep.