Wel, wat ook al jou opsie is, een ding is seker: die werksomgewing sal nooit weer dieselfde wees nie – nie wêreldwyd nie en ook nie in Suid-Afrika nie.

 

Dit is die mening van dr Marissa Brouwers, ’n geregistreerde bedryfsielkundige en senior lektor by die Skool vir Bedryfsielkunde en Mensehulpbronbestuur by die NWU.

 

Die NWU & U het met Marissa, wat ook die voorsitter van die Vereniging vir Bedryfs- en Organisasiesielkunde van Suid-Afrika vir 2019/2020 was, gesels oor die veranderinge wat ons in die werksomgewing van die toekoms te wagte kan wees.

 

Soek oplossings wat werk

 

Marissa wys daarop dat die Harvard Business Review die Covid-19-pandemie beskryf het as die beduidendste sosiale eksperiment van die toekoms van werk, met werk van die huis af en beleide oor sosiale distansiëring wat die manier waarop ons werk en met mekaar omgaan, radikaal verander het.

 

“Wat ek veral betekenisvol vind, is die gebruik van die woord ‘eksperiment’,” sê Marissa. “Dit skets vir ons ’n prentjie van speel, en van die uittoets van moontlike oplossings totdat ons dié kry wat die beste werk – en moontlik verskillendes vir verskillende maatskappye en bedrywe.”

 

Is dit bly of gly?

 

Marissa glo dat party mense inderdaad sal terugkeer kantoor toe. “Dit is ondenkbaar dat dit nie sal gebeur nie … maar almal sal nie terugkeer nie, selfs wanneer dit moontlik en veilig is om dit wel te doen.”

 

Vir die werkers wat steeds van die huis af gaan werk, is daar voor- sowel as nadele.

 

Marissa sê die voordele van werk van die huis af, of fleksiewerk, sluit die volgende in:

• groter buigsaamheid ten opsigte van die balansering van ons persoonlike en professionele lewens;
• die verkryging van nuwe tegnologievaardighede en die doeltreffende gebruik van digitale platforms;
• dat ’n mens nie hoef te reis om by die werk te kom nie en meer produktiewe maniere kry om jou tyd te benut; en
• dat ’n mens groter outonomie het – ons kan kies waar (byvoorbeeld tuis of in ’n koffiewinkel) en wanneer ons wil werk.

 

Daar is egter ook ’n negatiewe kant:

• Sommige van ons is geneig om langer ure te werk, aangesien die grense tussen ons werks- en persoonlike tyd vervaag.
• Ons kan gevoelens van eensaamheid ervaar, aangesien werknemers van mekaar geskei is, of ons aandag kan deur ons huishouding en gesinsituasie afgetrek word.
• Van ons kan meer uitgeput voel en groter kognitiewe dissonansie ervaar, aangesien dit moeiliker is om tydens virtuele vergaderings betrokke te voel.

 

Besighede moet veilige ruimtes skep

 

As werknemers na hul lessenaars by die werk terugkeer, het organisasies egter die verantwoordelikheid om ’n veilige kantooromgewing te skep. Dit is veral waar terwyl daar nog nie ’n wêreldwye entstof vir Covid-19 beskikbaar is nie.

 

Marissa sê werkgewers moet die volgende in gedagte hou wanneer hulle aan planne dink om werkers te laat terugkeer kantoor toe:

 

• Hoe kan ’n gedeelde kantoorruimte veilig en aantrekliker gemaak word?
• Wat kan van die huis af gedoen word, dalk selfs meer doeltreffend?
• Is daar ’n opsie om die beste van albei wêrelde te ervaar?
• Kan ons van ons werkers mense maak wat vir hulleself kan dink, selfvertroue het en vertrou kan word om hulle veiligheid sowel as werksdoeltreffendheid in gedagte te hou?

 

Kantore behoort herbeplan te word

 

“Kantore moet dalk heeltemal herbeplan en verander word,” sê Marissa. “Organisasies moet anders kyk na hul werk en na die rol van kantore in die skepping van ’n veilige, produktiewe en genotvolle werk en lewe vir hul werknemers.”

 

Werkgewers kan en moet na futuristiese idees vir die “nuwe” werksomgewing kyk. Dit kan insluit dat daar deurlopende videokonferensies, afstandsamewerkingsruimtes (soos virtuele witborde) en outonome maar aanpasbare werksmodelle beskikbaar is.

 

“Dit berus uiteindelik by ons almal om te dink en kreatief te wees, om te speel en maniere te vind om te werk wat vir ons funksioneel is, met nuwe en innoverende idees oor ons konneksie met ander en die veilige gebruik van gedeelde ruimtes,” sê Marissa.