Nadat sy haar BA-graad in joernalistiek in Johannesburg voltooi het, het sy by die NWU vir haar honneursgraad in politiek en internasionale betrekkinge ingeskryf.

 

Delf dieper

 

“Ek het geweet ek wil ’n joernalis word, maar ek het besluit om my ma se raad te volg en my studies voort te sit eerder as om dadelik te begin werk,” sê sy oor haar besluit om haar honneursgraad aan die NWU te voltooi.

 

Die titel van Sentleeng se navorsingstudie was “An analysis of trade in illicit diamonds in the Democratic Republic of Congo's mining industry”. Dit was die uitvloeisel van wat sy beskryf as ’n aangebore belangstelling in die verskynsel van die bestuur van mense en hulpbronne.

 

Hoewel sy soms met haar navorsing gesukkel het, het sy haar studie laat in 2011 voltooi en haar graad met lof behaal.

 

Van uitdagings tot sterkpunte

 

“Ek glo die uitdagings wat ek ervaar het, het my baie gehelp om my sterkpunte te ontwikkel en aan my swakhede te werk. In my beroep as joernalis is navorsing noodsaaklik, en danksy my nagraadse studies kan ek nou met gemak navorsing doen,” sê Sentleeng.

 

Sy sê lesse uit modules – soos die formulering van buitelandse beleid en onderhandeling, internasionale politieke ekonomie, streekstudies, sekuriteit en wêreldwye transformasie, en die ontleding van buitelandse beleid – is uiters waardevol in haar werk.

 

Die wêreld deur haar oë

 

“Die wêreld verander voortdurend, en as joernalis is dit my verantwoordelikheid om die veranderende wêreld vir die massas te bestudeer en te vereenvoudig. Begrip van die formulering en aanpassing van beleid is noodsaaklik.

 

“Ons moet byvoorbeeld nou ’n wêreldwye pandemie in die vorm van Covid-19 hanteer. Ons wêreldgemeenskap moes selfondersoek doen as die beste vorm van verdediging, en dit sal verreikende gevolge hê vir hoe ons voortaan sal leef en sake doen,” verduidelik Sentleeng.

 

Sy beskryf haarself as selfgemotiveerd en ’n baie entoesiastiese spanwerker wat leierskapsrolle en verantwoordelikhede kan aanvaar, en dit werklik geniet om met mense te werk en idees te deel.

 

En wanneer dit tyd is om te ontspan, ontsnap sy na die wêreld van flieks.