Geagte alumni

Dit is wonderlik hoe ons woordeskat die afgelope paar maande uitgebrei het. Koronavirus. Covid-19-pandemie. Staat van inperking. Sosiale distansiëring. Dit is alles woorde wat ’n rukkie gelede nog nie deel ons alledaagse woordeskat was nie.

Ja, ons leef inderdaad in ’n nuwe werklikheid – of, soos sommige dit noem, die nuwe normaal. Een van die woorde wat deel van hierdie nuwe normaal is, is frustrasie. Dit is byvoorbeeld wat jy voel wanneer jou troeteldiere en/of kinders ’n lawaai opskop terwyl jy met ’n aanlyn vergadering met jou kollegas besig is, jou pantoffelvoete mooi onder die eetkamertafel weggesteek.

Gelukkig – as gevolg van die natuurlike oorlewingsinstink van ons spesie – is daar ’n ander woord met ’n baie meer konstruktiewe betekenis wat ook in hierdie tyd na vore kom, naamlik innovasie.

Dit het by die NWU vir ons personeellede tweede natuur geword om buite die boks te dink. Ons IT-departement het hulle kapasiteit en verbeelding tot nuwe hoogtes gevoer en die byna onmoontlike vermag om aanlyn leer moontlik te maak. Daarby het ons akademici hul uiterste bes gedoen om nuwe aanlyn onderrigvaardighede te bemeester – alles om die akademiese jaar te help red.

By die NWU reik ons ook na gemeenskappe buite ons kampusse uit. Op die Eagi-nuusbladsy is daar skakels na verskeie NWU Nuuskamer-artikels oor ons akademici en studente wat met innoverende idees vorendag gekom het om mense en gemeenskappe in hierdie moeilike tye te help.

Jy bevind jouself ook waarskynlik in hierdie dae in ietwat onbekende vaarwaters. Kom ons wees almal innoverend – nie net om die inperkingstyd te oorleef nie, maar ook om uitdagings in geleenthede te omskep. Weet asseblief dat ons by die NWU in hierdie tyd aan julle, ons alumni, dink.

Lekker lees,

Nelia en die

NWU & U-span