Beste mede-alumni,

 

Met Suid-Afrika wat uitdagings soos werkloosheid en afhanklikheid van die regering in die gesig staar, is ek dankbaar dat my tyd by die NWU my die waarde van harde werk laat besef het.

 

Terwyl ek op die Mahikengkampus studeer het, was ek die redakteur van die sake- en sportafdeling van die kampuskoerant, The Album.

 

Die feit dat ek kon deel wees van die koerant het regtig my professionele lewe verander en gevorm. Dit het aan my die geleentheid gegee om kritieke en waardevolle eienskappe te ontwikkel, waaronder my leierskaps- en gekoördineerde beplanningsvaardighede, wat my uiteindelik laat deurdruk het en laat sien het hoe my doelwitte verwesenlik word.

 

Uitdagend sowel as opwindend

 

Die lewe op die kampus was terselfdertyd uitdagend en opwindend.

 

My betrokkenheid by die kampus se mediagemeenskap het my selfvertroue en vermoë om netwerke te bou baie verbeter. Soos hulle sê, “jou netwerk is jou netto rykdom”, en as skrywer kon ek onderhoude met ’n klomp ongelooflike mense voer, van wie sommige nou leiers op hul vakgebiede is.

 

Ek is vandag die hoof van finansiële bestuursdienste by die Rustenburg Plaaslike Munisipaliteit.

 

Ek is ook ’n stigter en hoof- uitvoerende beampte van Tumelo L and Associates, ’n rekeningkundefirma wat klein en medium ondernemings met hul besigheidsnakomingsbehoeftes help.

 

Ons span brei uit

 

Ons span by Tumelo L and Associates is besig om te groei, met die onlangse aanstelling van ’n geoktrooieerde rekenmeester, ’n belastingpraktisyn en vyf rekeningkundeklerke. Dit was vir ons ’n groot mylpaal om ’n ervare geoktrooieerde rekenmeester by ons span te laat aansluit en om meer werk vir gegradueerde rekeningkundiges te skep.

 

Om by die munisipaliteit te werk en terselfdertyd ’n besigheid te bedryf, kan nogal uitdagend wees, maar deur genade en harde werk kan ’n mens twee balle in die lug hou.

 

Terwyl ek my daaglikse take by die munisipaliteit verrig, werk my span by die firma aan besigheidskwessies. So verseker ek dat my privaat praktyk, wat ek aan die munisipaliteit verklaar het, nie my voltydse werk beïnvloed nie. Trouens, dit help my om relevant te bly op rekeningkundige gebied.

 

As ’n rekenmeester en professionele staatsfinansiesbeampte, kom ek soms voor ’n klomp uitdagings te staan. Ek glo egter dat al die lewens- en professionele vaardighede wat ek by die NWU verkry het, my voorberei het vir enige terugslag of mislukking wat ek kan teëkom op my pad om die “staatsamptenaar van die toekoms” te wees.

 

 

Vriendelike groete,

 

Tumelo Letlojane