Die galageleenthede van die jaarlikse fees, wat deur NWU Kunste en die Kampusstudenteraad se Kunsteraad op die kampus in Potchefstroom aangebied word, het op 9 en 10 Mei plaasgevind.

 

Dit is by die Skool vir Musiek se konserwatorium aangebied, wat ’n baie kleiner lokaal is as die ouditorium waar dit voorheen aangebied is. Die aand was ’n viering van die uitvoerende en visuele kunste, wat ’n uitstalling in die foyer ingesluit het.

 

Altesaam 45 kunstenaars het in meer as 20 items hul beste gelewer, en seker gemaak daar is iets vir elkeen om te geniet.Die sanger Nadine was die programdirekteur, en die talentbeoordelaars het dosent Desmond Phuthi, televisieaanbieder en kommunikasiekundige Sinki Mlambo, en die Aardklop Kunstefees se Alexa Strachan ingesluit.

 

Dis waar sterre skitter

 

Jaco van der Walt, bestuurder van NWU Potchefstroom Kunste, sê die Pukki Talentfees is een van die talle platforms wat hulle geskep het vir studente om met hul talente te spog.

 

“Hierdie jaar se fees was weer ’n wonderlike ervaring. Die talent was verstommend. Ek glo vas hierdie jaar se deelnemers sal in die voetspore van dié van vorige Pukki Talentfeeste volg, byvoorbeeld dié van Katlego Maboe, en ons land se verhoë betree en in die toekoms bekende persoonlikhede word.”