Vir die voornemende studente wat die NWU se ope dae bywoon, is hierdie geleenthede waardevol, want dit stel hulle bekend aan die kampusse wat binnekort hul nuwe tuistes kan word.

 

Te midde van ’n atmosfeer vol opwinding en verwagting het meer as 10 000 voornemende studente en hul familielede 2019 se ope dae by ons universiteit bygewoon. Hierdie geleenthede het onderskeidelik op 11, 18 en 24 Mei in Potchefstroom, Vanderbijlpark en Mahikeng plaasgevind.

 

Drie feite om weg te neem

 

Visekanselier prof Dan Kgwadi het die toekomstige studente en hul ouers vertel dat hulle drie feite oor die NWU moet onthou.

 

Die eerste is dat die universiteit bekend is vir betrokke vakkundigheid. Dit het betrekking op ons kernbesigheid van onderrig en leer, navorsing en innovasie, en gemeenskapsbetrokkenheid, het hy gesê.

 

Tweedens moet voornemende studente en ouers onthou dat die NWU daartoe verbind is om maatskaplik responsief te wees en met ’n sorgsaamheidsetiek op te tree. “Dit sal definieer hoe julle as studente en ouers by die universiteit aansluit wanneer julle deel raak van ons NWU-gemeenskap.”

 

Ons wêreldwye voetspore

 

Die derde punt wat die moeite werd is om te onthou, is dat die NWU ’n internasionaal-erkende universiteit is. Die talle internasionale studente op ons kampusse is een aspek wat ons wêreldwye voetspore wys. Dit maak die universiteit “die plek waar studente die wêreld kan beleef”, het hy uitgewys.

 

Wat die NWU nog meer spesiaal maak as ’n potensiële tuiste, is – in prof Dan se woorde – dat dit “’n plek is waar elke student se volle potensiaal gerealiseer word”.

 

* Dit is volgens ’n artikel wat op Quacquarelli Symonds se webtuiste gepubliseer is, wat ’n konserwatiewe Webometrics-telling van 26 000 gebruik.