Die NWU het in 2016 twee splinternuwe fasiliteite op die Potchefstroomkampus onthul.

Die een gebou het reeds bestaan en is vir die Noordwes-Universiteit se Skool vir Besigheid en Korporatiewe Bestuur opgeknap, en die ander is 'n splinternuwe gebou wat vir Farmasie en Biologiese Wetenskappe ontwerp is.

Die een vleuel van die Farmasie en Biologiese Wetenskappe-gebou huisves tans die Skool vir Farmasie, wat vier vloere in beslag neem. 'n Kliniese Farmasie-groep en simulasielaboratorium is op die eerste vloer. Op die tweede vloer is Farmasiepraktyk en vier kleiner lesinglokale, en op vloer drie Farmakologie en nog 'n laboratorium.

Gereed vir besigheid

Die nuwe fasiliteite van die NWU-Skool vir Besigheid en Korporatiewe Bestuur word in Potchefstroom se oorspronklike Standard Bank-gebou langs die President Pretorius-museum gehuisves.

Die nuwe gebou bevat twee lesinglokale, 'n konferensielokaal, ontvangsaal, moderne kombuis en verskeie administratiewe kantore. Dit is ten volle toegerus om die nuut gevormde NWU-Skool vir Besigheid en Korporatiewe Bestuur vorentoe te neem wat oop afstandsonderrig betref en ook om uitstekende kontakonderrig van internasionale gehalte te bied.

Die nuwe lesingfasiliteite voldoen ook aan die akkrediteringsvereistes van die Vereniging vir MBA's. Dit verwys na die estetiese voorkoms en gevoel van die lokale, sowel as die tegnologiese gevorderdheid van hulpmiddels soos Wi-Fi en videokonferensiegeriewe.