Beste mede-alumi,

 

Ons is ’n hele familie van Potchefstroomkampus-alumni hier in Australië. Ek, Lindie Nell, en my man, Flip Nell, het in 2008 ons tasse gepak en met ons eenjarige seuntjie die groot stap geneem.

 

Ek is tans deeltyds ’n kinderterapeut by ’n residensiële dwelm- en alkohol-rehabilitasiesentrum en werk met ma’s en hulle kinders. Ek het maatskaplike werk aan die voormalige Potchefstroomse Universiteit vir Christelike Hoër Onderwys (PU vir CHO) studeer en was in Karlien-dameskoshuis (1990-1993). In 2009 het ek hier vanuit Australië ʼn meestergraad deur die NWU behaal. Flip, wat in Patria was terwyl hy elektroniese ingenieurswese studeer het (1990-1993), werk tans in Sydney as ’n geografiese-inligtingstelselkonsultant.

 

Ons bly ’n uur van Sydney af op die Central Coast. Dit voel behoorlik of ons in die paradys woon: in ʼn boomryke omgewing met strande te kus en te keur rondom ons. Ons kinders is in ’n Christen-skool. In Chris (9) se klas is daar vier kinders wat van Suid-Afrika af kom en in Gussie (6), die dogter wat ons intussen ryker geword het, se klas is daar vyf. Hul drama-juffrou, Wiesie Bester, is ons buurvrou en ook ʼn alumna.

 

Ons kinders se ouma, Ralda Nell, is ook hier in Australië – sy het ʼn Universitêre Laer Onderwysdiploma aan die PU vir CHO behaal (1960-1962.) Boonop het die kinders ook ’n oom en tannie hier. Hercu Coetzee, primaria van Caput (1981-1988) en sy vrou, Louiza (née Coetzee), ’n oud-Alabamalid en HK-lid van Heide (1985-1988), was die eerste twee brawe alumni in die familie wat Suid Afrika verlaat het.

 

Hulle was eers in Nieu-Seeland en het later Australië toe geïmmigreer. Hulle woon tans in Grafton waar hulle hul eie apteek het. Hulle dogter, Ane Coetzee, studeer in Sydney. Ouma Ralda bly ook in Grafton en help so nou en dan in die apteek en om ons kinders tydens vakansies te kom oppas.

 

Die verlange na ons familie in Suid-Afrika is groot. My pa, Chris Windell (75) en broer, Winton Windell, is nog steeds aan die Potchefstroomkampus verbonde. Daar is ook twee niggies wat tans daar studeer.

 

Vir die wat wou weet: ons skreeu nog steeds vir die Bokke en Proteas en ons seuntjie, ’n groot krieket-fanatikus, twyfel nie daaraan dat hy eendag vir Suid Afrika wil krieket speel nie.

 

Groete uit ’n warm, sonnige Australië.

 

Lindie Nell