Dr Santisa Viljoen, dosent in toegepaste vokale studies, stempedagogie en koordirigering aan die Skool vir Musiek op die Potchefstroomkampus, sê die produksie was ekstra spesiaal omdat al die sangers NWU-studente is en die opera hulle ʼn geleentheid gebied het om hul uitsonderlike talente ten toon te stel.

 

Opera vir ’n wyer gehoor

 

Die eerste opvoering was op 11 September in die Konservatorium in Potchefstroom. Dit is gevolg deur opvoerings op 13 en 14 September in Ikageng, 15 September in Jouberton en 18 September in die Totiussaal op die Potchefstroomkampus.

 

Santisa sê die vokale departement van die Skool vir Musiek het ’n uitnodiging gerig aan die direkteur van die Umculo Opera Incubator en wêreldbekende tenoor, Kobie van Rensburg (wat ook een van vanjaar se ontvangers van die gesogte NWU-Alumnitoekennings is), en Shirley Apthorp, stigter van Umculo, om dosente en studente te help met voorbereiding vir die produksie. Umculo het gereël dat die befaamde Duitse verhoogregisseur, Robert Lehmeier, die regie behartig.

 

Figaro vir Suid-Afrikaanse konteks

 

Mozart se oorspronklike meesterstuk is’n komiese opera in vier bedrywe wat die 18de-eeuse verhaal vertel van Figaro en Susanna se troudag. Wanneer Figaro uitvind graaf Almaviva is besig is om flikkers te gooi by Susanna, maak hy planne om die graaf se hand in die as te slaan. Die storie ontvou met die graaf wat uiteindelik die stryd gewonne gee en ʼn dubbele bruilof wat gehou word.

 

Sarah Suping sing die rol van Susanna en Edwin Padosa die rol van graaf Almaviva.Die weergawe vir plaaslike gehore is spesiaal aangepas vir die Suid-Afrikaanse konteks. Die storie speel af in ’n township-kombuis eerder as Spanje. Die opera is ook verkort. Dit is steeds in Italiaans gesing, maar studente het met Robert Lehmeier, die regisseur, saamgewerk om toepaslike Engelse dialoog te skryf om die Italiaanse resitatiewe te vervang. (Resitatiewe is die musikale voordrag in die vertellende en dialoogdele van’n opera.)

 

“Om seker te maak dat jonger gehore hul opera-ervaring geniet, het Umculo ook interaktiewe werkswinkels vir skoolkore en belangstellende groepe in die gemeenskap aangebied,” sê Santisa. “Deelnemers is aan die wêreld van opera en Figaro bekendgestel sodat hulle maksimum waardering vir die opvoering kon hê.”

 

Sy sê hulle is baie trots op die produksie. “Ons het ʼn uiters beperkte begroting gehad en dit was harde werk, maar volgens die terugvoer van die gemeenskappe was dit beslis die moeite werd.”