Programdirekteur Hanlie Smuts van Korporatiewe Kommunikasie spreek die alumni by die ontbytgeleentheid toe.

Alumnus en seremoniemeester Thami Mangezi het beslis nie na woorde gesoek tydens die onlangse afskeidsfunksie vir finalejaarstudente nie.

Watter pragtige gesig: blinkoog-finalejaarstudente sit die Groot Lapa vol vir hulle afskeidsfunksie.

In pas met die kleredragkode van “lentekleure” was die 700 finalejaarstudente ’n pragtige gesig, veral met die prentjiemooi Vaalrivier as agtergrond.

 

Dit was die toneel op 25 Oktober 2018 by die Groot Lapa op die kampus in Vanderbijlpark toe die visekanselier, prof Dan Kgwadi, en alumna Nkateko Khoza die finalejaars toegespreek het. Die tema van die funksie was “Die einde van een era en die begin van ’n ander een”.

 

Daarmee in gedagte het prof Dan en Nkateko gesê hulle moet die NWU in hul harte bewaar, aangesien die era van studentwees tot ’n einde kom. Hulle het die studente ook aangemoedig om in kontak te bly wanneer hulle die nuwe era as alumni betree.

 

Vorentoe in tyd

 

’n Paar dae later, op 29 Oktober, het ’n ander groep op die kampus bymekaargekom. Met hul finalejaar-afskeid nou net ’n kosbare herinnering uit die verlede, het 50 alumni ’n ontbyt bygewoon waar adjunk-visekanselier prof Linda du Plessis hulle toegespreek het.

 

By hierdie geleentheid het hulle ook meer inligting oor die Konvokasie ontvang. “Ons het dit hoog op die agenda geplaas nadat ons talle oproepe van ons alumni ontvang het wat gevra het wat die Konvokasie presies is,” sê alumniverhoudingepraktisyn, Zanele Ngobese.

 

Ons het aan die einde van 2018 gesien hoe nog ’n era plek maak vir ’n nuwe een en nog ’n groep studente in alumni verander. Daar is egter een konstante element in hierdie vloei van tyd: die onbreekbare band tussen alumni en hul alma mater.

Teenwoordiges by die funksie wat vir finalejaars aangebied is, is (van regs) Clement Manako, uitvoerende direkteur vir korporatiewe verhoudinge en bemarking, eerwaarde David Dinkebogile, ’n NWU-raadslid, en Jacob Simango, direkteur vir studentelewe op die kampus in Vanderbijlpark.