Ten spyte van die vertragings as gevolg van die pandemie is die nuwe Administrasiegebou op die Vanderbijlparkkampus uiteindelik op 27 Augustus 2021 geopen.

Hierdie nuwe gebou, wat nou die kampusbestuur en die hele kampusadministrasie huisves, is die produk van die kampus se pogings om sy langdurige stryd ten opsigte van werksruimte te hanteer.

Prof Linda du Plessis, adjunk-visekanselier vir beplanning en Vanderbijlpark-kampusbedrywighede, sê die opening van die nuwe gebou was ’n heuglike oomblik.

“Hierdie gebou moet baie meer wees as bloot ’n werksruimte – dit moet ’n plek wees waar almal welkom en tuis voel,” sê sy.