Eagi, ons NWU-maskot, help julle om tred te hou met alles wat by die NWU gebeur. So, laat ons sonder meer na die nuuskamer toe gaan waar Eagi vir julle ’n oorsig sal gee.

Ons vertrou dat julle die volgende stories interessant sal vind. (Klik op die opskrif van elke artikel om meer te lees.)

Skuif na aangepaste vlak 2 is positief, maar ekonomie is nog in die moeilikheid  

President Cyril Ramaphosa se aankondiging oor die verskuiwing van Suid-Afrika na aangepaste vlak 2 van die inperking is positief vir die ekonomie, waarvan die vooruitsig egter steeds verdere versterking en die bou van vertroue nodig het.

Prof Raymond Parsons, ekonoom van die NWU-Besigheidskool, het die aankondiging verwelkom wat op 12 September gemaak is om na ’n minder beperkende vlak 2-inperking te beweeg.

“Hoewel die onlangse groeisyfers van die bruto binnelandse produk (BBP) beter is as wat verwag is, en daar wye verwagtings is dat dit die ekonomie weer op koers plaas om hierdie jaar tot ’n 4,5%–5%-groeikoers te herstel, is die ekonomie nog glad nie uit die moeilikheid nie.”

Wetenskap laat jou vlieg!

Wetenskap is verskriklik verslawend. Dit gee vir ’n mens ’n kykie op wonders waaraan jy in jou wildste drome nie kon dink nie. Godfrey Mosotho weet dit beter as die meeste mense en hy hou nie hierdie geheim vir homself nie.

Hy is besig met ’n eksperiment waarin hy meteorologiese ballonne die lug in stuur om geïoniseerde straling in die atmosfeer verskeie kilometer hoog in die lug te meet. Wat hierdie benadering uniek maak – benewens die navorsingsimplikasies daarvan – is dat die projek ook as ’n uitreikprogram dien. By sy mees onlangse lansering was leerders van die Saints Christian Skool (laerskool) in Potchefstroom by om die pret mee te maak.

Godfrey het sy doktorsgraad aan die NWU voltooi waar hy op stralingsdosimetrie op vlughoogtes gefokus het. Hy is tans ’n postdoktorale navorser by die Fakulteit Natuur- en Landbouwetenskappe.