Ngaka Gerhard du Plessis ke moeteledipele wa setlhopha sa porojeke se se thusang go tlhomamisa gore Porokeramo e ntšha e e itirisang e e Kopantseng Tiro le Go Ithutela Tiro (WISL) e tlamela legoro ka ditlhoko tsa lone. Gerhard ke mokaedi wa ditiro tsa lefelo le le lengwe tsa go ruta le go ithuta mo Senthareng ya Go Ruta le Go Ithuta.
Tobetsa diaekone tse di fa godimo go bona ditshwantsho
Tobetsa fano go buisa athikele ka botlalo ka letsholo la WISL.
Kgatelopele
Go dirilwe kgatelopele ya go tsenya tirisong porokeramo e e kopantseng tiro le go ithutela tiro (WISL). Tobetsa lebokoso gore o buise go ya pele.
Mo lobakeng lo lo khutshwane fela lwa nako, le ka dikgwetlho tse di seng kana ka sepe, setlhopha sa tlhamo eno se nna se beile leitlho kwa bowelong jwa tiro eno, ka go itse gore fa nako e ntse e tsamaya, porokeramo eno e tlile go solegela molemo thata magoro a a dirisang dimmojule tsa WIL kgotsa tsa SL.
Baithuti bano ba romelwa kwa mafelong a a farologaneng a tiro mo dikarolong tse di farologaneng tsa naga ya rona mme go ba tsaya botlhe ka motlhala gore ba rometswe kae, ke namane e tona ya tiro, segolobogolo fa re akanya ka kgang ya gore seno sotlhe se dirwa ntle le tiriso ya porokeramo e e rileng.
Jaanong dikgang tse di monate ke gore Porokeramo e ntšha e e itirisang e e Kopantseng Tiro le Go Ithutela Tiro (WISL) e a re namola.
Porokeramo e e kopantsweng eno e laola kwa baithuti ba tla romelwang teng ka go itirisa, e bile gape e aba le batlhaba-botlhale ba baithuti ba ba tlileng go sekaseka boleng jwa ditiro tsa baithuti bano.
Go nna le WISL e ba sa bolong go e batla
YBB e ntse e batlana le tharabololo e e kopantsweng ya go laola mokgwa wa go dirwa ga pego ya ditiro ka porokeramo e e kopantseng tiro le go ithutela tiro
Ka 2019 Legoro la Thuto le ne la ntsha kopo e e potlakileng ya go nna le porokeramo ya WIL, ka gonne go ne go sa tlhole go kgonega jaanong go dirisa thulaganyo e e siilweng ke nako e e dirang ntle le porokeramo epe ya go romela baithuti go ya go lekeletsa bokgoni jwa bone jwa tiro.
Go ne ga bonala ka bonako gore baithuti ba tsa thuto e ne e se bone fela ba ba neng ba tlile go solegelwa molemo ke phetogo eno. Metlotlo e ne ya senola gore ba tiro ya booki le ba khemisi le bone ba ka nna ba solegelwa molemo ke porokeramo e e kopantsweng eo.
Tshimologo ya go tlhamiwa ga yone
Setlamo sa Matogen se ne sa newa thendara ya go tlhama porokeramo ya WISL ka Diphalane 2019.
Go ne ga kokoanngwa maloko a setlhopha se se neng se tlile go okamela thulaganyo ya go tlhamiwa ga yone. Maloko a setlhopha a ne a tswa mo Legorong la Thuto, mo Sekolong sa Booki le mo Sekolong sa Khemisi, le Tsamaiso ya Botshelo jwa Baithuti jwa Akatemi le Matogen.
Lefapha la IT, Segolobogolo la Tlhamo ya Porokeramo ya Kgwebo le Kemonokeng le lone le ile la nna le seabe se segolo mo thulaganyong ya go tlhamiwa ga yone,
Go ya katlegong kgato ka kgato
Setlhopha se ile sa swetsa ka go dirisa thulaganyo ya kgato ka kgato, e e tlamelang ka ditlhoko tsa ka potlako tsa Legoro la Thuto pele.
Baemedi ba Sekolo sa Booki, Sekolo sa Khemisi le Legoro la Boenjenere ba ne ba nna ba beile ditiro tseno leitlho go tlhomamisa gore le ba tlamela le ka ditlhoko tsa bone tse di kgethegileng.
Fa kgato eno e sena go wediwa, bagakolodi ba ne ba simolola dipatlisiso tsa tlhokego eno mo magorong a mangwe le mo dikolong tse dingwe.
Ngwaga le ngwaga, YBB e tshwanetse go batlela baithuti ba ba fetang 1 000 ba YBB diphatlha mo dikolong, mo dikgwebong le mo mafelong a tsa kalafi mo nageng yotlhe ya rona, ba ba tlhokang go nna la maitemogelo mo tirong pele ba tshwanelegela go e dira.
THUTO
BOOKI
KHEMISI
Mo Legorong la Thuto
Mo Legorong la Thuto, jaanong baithuti ba ka ikwadisetsa go romelwa kwa dikolong tse ba itlhophelang tsone, kwantle ga go boifa gore porokeramo e ka ba romela ntle le go nyalanya dintlha sentle kgotsa go romelwa kwa mafelong a mabedi ka nako e le nngwe. Ke ka gonne porokeramo ya WISL e ela tlhoko bokgoni jo dikolo di nang le jone le palo ya diphatlha tse di bulegileng tsa dirutwa tsa kgato nngwe le nngwe ya thuto.
Batlhaba-botlhale (batlhatlheledi) ba ba sekasekang boleng jwa tiro ya baithuti le bone ba ka romelwa ke porokeramo eno e bile ba kgona go bona thulaganyo ya seno mo sekerining sa sedirisiwa sa bone sa mmobaele fa ba bula sediriso sa WISL. Seno, mmogo le ntlha ya gore puisano ka ga gore ba romelwa kae e kgona go dirwa ka porokeramo eno, se tlhofofaletsa batlhatlheledi fela thata go dira dithulaganyo tsa bone tsa maeto.
Sekolong sa Booki
Mo Sekolong sa Booki, WIL ke karolo ya konokono ya lenaanethuto la Batšhelara ya Booki, e e laolwang ke Lekgotla la Booki la Aforikaborwa (South African Nursing Council [SANC]). SANC e tlhoma palo ya diura tsa WIL tse baithuti ba booki ba tshwanetseng go di dirisa kwa mafelong a tsa kalafi a a neilweng tetlelelo-semmuso gore ba tshwanelegele go nna baoki ba seporofešenale ba ba kwadisitsweng.
Go tla go fitlha jaanong, go dirilwe kgatelopele e kgolo ya go nyalanya porokeramo ya WIL le dipatlafalo tsa booki le dikaelo tsa jone. Go setse go weditswe karolo nngwe ya porokeramo eno le go lekelediwa, mme Sekolo sa Saense ya Booki se itumelelela dipholo tseno fela thata.
Sekolong sa Khemisi
Mo Sekolong sa Khemisi, baithuti botlhe ba khemisi, ba tshwanetse go dirisa diura di le 400 mo lefelong la go ithutela tiro, go ya ka melao ya Lekgotla la Aforikaborwa la Khemisi.
Badiri kwa Sekolong sa Khemisi, se se ntseng se dirisa porokeramo e e kwadilweng mo pampiring go balelela diura tse di dirilweng, ba itumelela thata go nna bangwe ba ba tlileng go dirisa porokeramo e ntšha ya eleketeroniki ya WISL e e tlhamilweng e e kopantseng ditiro. Ka nako ya totlelelo, go ne ga tlhamiwa karolo ya porokeramo eno e e tsholang palo ya baithuti e bo e lekelediwa.
Porokeramo e e itirisang
E TLHOFOFATSA THOMELO
ya baithuti ya go lekeletsa bokgoni jwa bone jwa tiro