eish9_tsw_voxpop

Fa o ne o ka tlhama mofuta wa bobedi wa 2020, o ne o tla lebega jang? Ke eng se o neng o tla se dira ka tsela e e farologaneng mo tirong ya gago ka namana le ya kwa tirong? Tseno ke dipotso tse re neng ra di botsa badiri-ka-rona ba le mmalwa.

A re utlweng gore ba reng.

Ga go na pelaelo gore rotlhe re tla dumalana gore 2020 e ne e le ngwaga o o sa tshwaneng le ope o mongwe. Re simolotse ngwaga ka dithulaganyo tse di neng di rulagantswe sentle, mme Covid-19 ya baka tshenyo e e neng ya tlhatlhamolola dithulaganyo tseo tsotlhe.

Lenet Raath

Mothusi-mogolo ka tsa tsamaiso kwa lefapheng la Tsamaiso ya Mokgwa wa Botshelo jwa Baithuti jwa Akatemi, Khamphase ya Mahikeng

Ono ke ngwaga wa ntlha mo lobakeng lo lo leele go bo ke dirile diphetogo mo mokgweng wa me wa botshelo, le fa ke ile ka tshwanelwa ke go lebana le dikgwetlho tsa leroborobo. Ke eletsa e kete ke ka bo ke setse ke ile ka dira diphetogo tseno ngwaga o o fetileng.

Ke ithutile go amogela maemo mangwe a ke sa kgoneng go a laola le go sola molemo se ke kgonang go se dira ka go rapela Morena ke sa kgaotse le go mo ikanya. Gape ke ithutile gore ke ka kgona go itumedisa batho bangwe ka dinako tsotlhe, le gore ke ka kgona go itumedisa batho botlhe ka dinako tse dingwe fela, mme ke ka se kgone go itumedisa batho botlhe ka dinako tsotlhe.

Gape ke lemoga boammaaruri jwa go amogela go latlhegelwa ke sengwe le go ipelela dilo tse di molemo mo botshelong. Le fa go ntse jalo, maikutlo a a siameng a a tshwanang le ano ga a reye gore o tlhokomologa mathata a botshelo. Go raya fela gore o a bo o na le tsholofelo e bile o batlana le molemo mo dilong, mo boemong jwa go letlelela dilo fela le go tlhoma mogopolo mo dilong tse di seng monate. Ka dinako tse dingwe, mokgwa o o lebang dilo ka one o ka tlisa pharologano e kgolo thata.

Tshepang Molale

Motlhatlheledi, wa Ditlhaeletsano, wa Khamphase ya Mahikeng

Mo go ba le bantsi ba rona, ke akanya gore potso ya mofuta ono e batla gore motho a ipatlisise pele gore botshelo jwa gagwe bo ntse jang ka boikaelelo jwa go bo tokafatsa.

Le fa go dira jalo go ka tswa go le botlhokwa, ke dumela gore ka dinako tse dingwe re iphelela pelo le gore ga re tseye tsia dilo tse di molemo tse di re diragaletseng mo botshelong.

Mo go nna, 2020 e ne e na le melemo mengwe mo go nna. E mpuletse tšhono ya go dira kgatelopele ka ntlha ya diphitlhelelo tse ke ka bong ke se kile ka nna le tsone fa ngwaga ono o ka bo o farologane le ka fa o ntseng ka gone, mme ke itumelela seno.

Fela jaaka batho ba bangwe botlhe, go santse go na le dilo tse dintsinyana tse ke eletsang ke ka bo ke di fitlheletse, mme go bua boammaaruri fela, tse di molemo di feta tse di seng monate tse di ntiragaletseng. Ka ntlha ya seo, ke ikutlwa ke le lesego go bo ke nnile le maitemogelo ano otlhe ka tsela e a tlileng ka yone monongwaga.

Eve Scorgie

Wa ofisi ya modini, wa Legoro la Thutabomodimo, wa Khamphase ya Potchefstroom

Fa ke ne ke ka kgona go tshela 2020 gape, ke ne ke tla leka go rata batho le go feta letsatsi lengwe le lengwe, le go dirisa nako le madi mo go sengwe le sengwe le mo go mongwe le mongwe yo ke mo ratang e bile a le botlhokwa mo go nna, kgotsa yo o bokoa yo o tlogetsweng a iphotlhere fela.

Ke ne ke tla nna le tšhono ya bobedi mo botshelong, ke ka bo ke se kile ka timana ka nako ya me: Ke ka bo ke se kile ka busetsa morago maeto a go ya go bona ba lelapa, malatsi a boikhutso kgotsa mekgele e ke e ipeetseng. Ke ka bo ke ile ka tshela botshelo jwa me ka botlalo mme e seng ka tsela e e botlhaswa.

Ke ka bo ke ile ka dirisa nako e ntsi ke itshidila mmele, le go ipelela tlhago le mowa o o foreše wa kwa ntle. Ke ka bo ke ile ka ipolelela gore ga go molato go re "nnyaa", le go tima khomphiutha ya me ka ura ya bo ne gore ke emise tiro. Ke ka bo ke ile ka ipolelela gore go ntse go siame le fa o sa kgone go dira sengwe le sengwe - le gore ga ke tlhoke go ikutlwa ke le molato ka gone.

Fa go kgonega, ke ka bo ke ile ka reka mekowa ya ditšhokolete le waene - ee, ke tlile go simolola go reka methalethale ya diwaene.

Mop Stefan Kruger

Mmatlisisi, yuniti ya patlisiso ya WorkWell, kwa Khamphaseng ya Potchefstroom

Le fa boima jwa mmele wa me bo wetse kwa tlase thata mo ngwageng ono, ke tshwanetse go ka bo ke jele maungo a mantsi le dijo tsa dithoro tse di nang le dikotla.

Go tsaya maemo gantsinyana go ka bo go bile ga itumedisa fela thata. Seno se ka bo se ile sa dira gore boboko jwa me bo se ka jwa akanya ka tsela e le nngwe fela ke sa tshwenyege ka se se diregang go ntikologa. Go ka bo go nnile monate go bua la morwaake Estian ka go ratana, maikutlo, le ka dilo dingwe tse ke di boifang le maitemogelo a a itumedisang a ke nnileng le one mo botshelong. Le gale nako e santse e le teng…

Ke ka bo ke ile ka itumelela go tlotla ka melaometheo ya botsamaisi jwa ditogamaano, le ka fa seno se neng se ka ama pholo ya badiri ka gone, le Mop Dan Kgwadi re ntse re nwa waene. Gape ke ka bo ke ile ka bolelela "badiri ka nna” ba WorkWell gantsi-gantsi gore ke a ba rata.

Kgopolo ya me ya bofelo ke ya gore – sengwe se ke ka se kang ka kgona go se fetola ka 2020, mme go ka bo go nnile molemo go se fetola – fa ke ka bo ke ile ka bolelela mosadi wa me yo o tlhokafetseng e leng Annalize gore ke a mo rata. Moano wa me wa 2020 ke, “Ga go tsela e e isang botshelo, mme boitumelo ke tsela ya botshelo …”

Jacob Simangu

Mokaedi wa botshelo jwa baithuti, wa Khamphase ya Vanderbijlpark

Ke ne nka rata gore mofuta wa bobedi wa 2020 o lebege jaana: Gore baithuti ba ba nang le dikgwetlho tsa go ithuta ba kopanngwe mme ba newe sebaka se ba ka se dirisetsang go tokafatsa dithuto tsa bone.

Ke ne ke ka rata go bona batsadi ba baithuti ba laleditswe go tla mo khamphaseng mme setlhopha sa botsamaisi sa YBB se bue la bone go ba netefaletsa boemo jwa rona jwa go naya bana ba bone tlhokomelo e e siameng.

Mo go 2020 wa me yo o tsamayang sentle, ke ka bo ke ile ka rata go bona baithuti ba tsaya karolo mo mefuteng yotlhe ya ditiro tsa morago ga kharikhulamo mo khamphaseng le kwa mafelobonnong.

Mop Susan Coetzee-Van Rooy

Mmatlisisi wa Lefapha la Go Tlhaloganya le go Tlhotlha Puo mo Maemong a a Raraaneng (Understanding and Processing Language in Complex Settings [UPSET]), wa Khamphase ya Vanderbijlpark

Fa ke ne ke ka itirela mofuta wa me wa 2020, ke ne ke tla simolola ka ikonomi e e atlegileng fela thata e e neng e tla tlamela batho ka tiro e e mosola e e neng e tla thusa batho botlhe mo Aforikaborwa go tshela matshelo a a nang le seriti.

Sa bobedi mo lenaaneng la me e ne e tla nna go naya barutwana le baithuti botlhe thuto ya mahala ya boleng jo bo kwa godimo mo Aforikaborwa. Se se neng se tla amana thata le keletso ya me ya pele e ne e tla nna go tlhabololwa ga dikago tsotlhe tsa sekolo go fedisa maemo a a tlhabisang ditlhong a go tlhoka metsi a a tswang mo pompong mo dikolong di le 300+ mo Aforikaborwa.

Sa bofelo, ke ne ke tla eletsa gore Maaforikaborwa otlhe a bue le go tlhaloganya bobotlana dipuo di le nne gore re oketse dikgono tsa rona le ditšhono tsa rona tsa go aga dikamano tse di nonofileng le go momaganya setšhaba.