Ngwaga wa Bosetšhaba wa Enactus
Lerato ke Motsamaisi wa
Motlhatlheledi e leng Lerato Mohalajeng o neilwe awate ya bosetšhaba go tswa go Enactus ya mo Aforikaborwa ka ntlha ya tsela e a tlhabang setlhopha botlhale ka yone sa Enactus ya YBB gore ba tlhagise dikgopolo tsa bogwebi le go di tsenya tirisong.
Ka ga Enactus
Enactus ke neteweke ya boditšhabatšhaba ya baithuti, baakatemi le baeteledipele ba kgwebo ba ba iketleeleditseng go tlhama lefatshe le le botoka ka tlhamosešwa le ka ditiro tsa kgwebo.
Mokgatlho ono o bolotsa baithuti ba yunibesiti mo lefatsheng lotlhe gore ba dirise kitso e ba e bapetseng mo phaposiborutelong go rarabolola mathata a kgwebo le a ikonomi mo ditikologong tsa bone.
Lerato, yo e leng motlhatlheledi mo Sekolong sa Disaense tsa Botsamaisi e bile e le mogakolodi-mmogo mo Enactus, o umakilwe ke Enactus ya mo Aforikaborwa gore ke Motsamaisi wa Ngwaga wa 2021. Ono ke mokgatlho wa lefatshe ka bophara wa Enactus o o dirisang bogwebi go fetola matshelo.
O amogetse awate ya go mo akgolela maiteko a gagwe a go kaela le go tlhaba botlhale setlhopha sa Enactus sa yunibesiti. Ka ntlha ya boineelo jwa gagwe, yunibesiti e ile ya fitlhelela diphitlhelelo tse dingwe mo kgaisano ya ngwaga ono.
O akgolelwa tiro ya mabogo a a duleng diatla
Mo moletlong wa diawate wa Motsamaisi wa Ngwaga, Enactus SA e akgola bagakolodi ba legoro ba ba dirileng tiro ya mabogo a a duleng diatla go tshegetsa setlhopha sa Enactus kwa diyunibesiting tsa bone.
Awate e newa motho fa tiro ya gagwe e le e e nang le matswela e bile a na le bokgoni jwa go rulaganya dilo sentle, jwa go okamela setlhopha, jwa puisano le ba bangwe, jwa boeteledipele le go dira tiro ya seporofešenale fa a rarabolola mathata a a amanang le Enactus le a setlhopha sa yunibesiti.
Mo nageng yotlhe, ditlhopha di le 27 tsa Enactus tsa yunibesiti di feditse ngwaga otlhe go tsenya dikgopolo tirisong fa ba ntse ba dira tiro ya go tokafatsa matshelo a ba bangwe. Mo kgaisanong ya ngwaga ono ya Enactus, setlhopha sa YBB se ne se tsere maemo mangwe mo go a ntlha a matlhano fa ba sena go gapa maemo a ntlha mo dikgaisanong tse pedi tse di kgethegileng tsa Enactus, a ntlha fa e sa le Enactus ya YBB e tlhomiwa ka 2010.
Kgakgamatso e e sa lebelelwang
Botlhe ba ne ba gakgamalela go utlwa gore awate ya Motsamaisi wa Ngwaga e gapilwe ke mang ka gonne Lerato le setlhopha sa gagwe ba ne ba lebana le dikgwetlho tse di farologaneng, segolobogolo mo nakong ya leroborobo la Covid-19. “Le fa go ntse jalo, go mekamekana le kgwetlho eno go nnile le matswela a magolo fela thata, mo go nna le mo baithuting ba Enactus,” o bolela jalo.
“Maitemogelo ano a ntswetse mosola e le tota, e seng fela mo seabeng sa me jaaka motlhaba baithuti botlhale mme le fa ke tsaya karolo mo netewekeng ya Enactus lefatshe ka bophara. Tota ke ne ke sa lebelela go ikgapela awate! Go dirwa ga kitsiso ya gore ke nna motsamaisi wa ngwaga go ntlhomamiseditse gore tiro ya rona ya ka natla e ne e se ya lefela e bile e ne e tsewa tsia.”
Fa Rre Sazi Gcume, motsamaisi wa mananeo a Kgaisano ya Bosetšhaba ya Aforikaborwa ya Enactus a ne a akgolela Lerato phitlhelelo eno, o ne a re: “O ne a nna le seabe ka tlhagafalo mo dikgaisanong tsotlhe le katiso, e bile o ne a dirisa madi a gagwe ka namana le nako go tlhomamisa gore setlhopha se ne se fitlhelela letlha le go tswalelwang ka lone.
“Maiteko a gagwe a dirile gore setlhopha se ikgapele maemo a ntlha kwa dikgaisanong tse di farologaneng ngwaga otlhe. Re a go akgola, Lerato. Re solofela gore seno e tla nna sekai mo go ba bangwe ba bantsi.”
Dikgopolo tse dintle ga di kitla di nna ditlhamosešwa tse di mosola ntle le fa di laolwa ka tsela e e mosola ya seporofešenale, e bile ga go yo o kgonang go dira jalo botoka go gaisa Lerato Mohalajeng.