Aangesien ons kernbesigheid onderrig-leer en navorsing is (met gemeenskapsbetrokkenheid by hierdie aktiwiteite ingeweef), was twee van die belangrikste poste om te vul dié van adjunk-visekanselier (AVK) vir onderrig en leer, en adjunk-visekanselier vir navorsing en innovasie.

Nadat hierdie twee poste geadverteer is, het die Raad die aanstelling van prof Robert Balfour as AVK vir onderrig en leer, en prof Refilwe Phaswana-Mafuya as AVK vir navorsing en innovasie goedgekeur.

Voor hulle nuwe aanstellings het Robert (voorheen die dekaan van die Fakulteit Opvoedingswetenskappe in Potchefstroom) as AVK vir onderrig en leer waargeneem, terwyl Refilwe die waarnemende uitvoerende direkteur vir die MIV/Vigs/STI/TB (HAST)-navorsingsprogram by die Raad vir Geesteswetenskaplike Navorsing (RGN) was.

Kampusse in bekwame hande

Ander sleutelaanstellings wat die Raad gemaak het, is dié van die AVK’s verantwoordelik vir kampusbedrywighede. Behalwe om aan die stuur te wees van die daaglikse funksies van die spesifieke kampusse, vervul hierdie AVK’s ook sekere funksies vir die universiteit as geheel.

Prof Fika Janse van Rensburg, voormalige rektor van die kampus in Potchefstroom, is verantwoordelik vir kampusbedrywighede in Potchefstroom en sal tot 31 Desember 2018 in daardie hoedanigheid diens doen. Hy is ook aangewys as die NWU se adjunkhoof tot aan die einde van 2017. Dit beteken dat hy ook die pligte van die visekanselier sal uitvoer as laasgenoemde nie beskikbaar is nie.

Prof Linda du Plessis is die tweede van die drie AVK’s op die kampusse. Sy was die voormalige viserektor vir akademie, kwaliteit en beplanning op die kampus in Vanderbijlpark, waarna sy amper twee jaar lank die waarnemende rektor van daardie kampus was.

Die derde AVK, wat vir kampusbedrywighede in Mahikeng verantwoordelik sal wees, sal aangestel word sodra die pos geadverteer is. Hierdie persoon sal prof Mashudu Davhana-Maselesele vervang, wat die rektor van die kampus in Mahikeng was, maar nie meer in diens van die NWU is nie.

Uitvoerende direkteurs neem leiding

Behalwe die vyf AVK’s is daar ook ’n registrateur, prof Marlene Verhoef, en vier uitvoerende direkteure.

Die registrateur en drie van hierdie uitvoerende direkteure vul steeds die poste wat hulle voor die implementering van die nuwe struktuur gehad het. Die uitvoerende direkteure is Elmarie de Beer (finansies en fasiliteite), Kedirang Oagile (mense en kultuur) en Clement Manoko (korporatiewe verhoudinge en bemarking).

Die vierde uitvoerende direkteur, in ’n nuwe pos met studentelewe as portefeulje, is prof Lumkile Lalendle, wat voorheen die viserektor vir onderrig-leer en kwaliteitsversekering op die kampus in Mahikeng was.

“Ek wil graag die aangestelde kollegas gelukwens,” sê prof Dan Kgwadi, visekanselier. “Ek glo vas hulle het almal die insig om die universiteit se strategie van transformasie en posisionering van die NWU as ’n unitêre instelling van voortreflike akademiese uitnemendheid met ’n toewyding aan maatskaplike geregtigheid te verseker. Ons sal saam in staat wees om die NWU tot groter hoogtes te voer.”