Dit is die moeite werd om wyse woorde in die media te deel, en die NWU se topwoordvoerders kan daarvan getuig. Die universiteit het sy jaarlikse Woordvoerders van die Jaar-toekenningsaand vir die 2016-tydperk op Donderdag, 27 Julie 2017 gehou.

Akademici van verskeie fakulteite het erkenning ontvang vir hulle positiewe bydrae tot die medialandskap om die instelling se naam te bevorder.

Prof Raymond Parsons van die NWU se Skool vir Besigheid en Korporatiewe Bestuur het vir die tweede agtereenvolgende jaar met die louere weggestap as die persoon wat die meeste aangehaal is.

Raymond is gedurende 2016 altesaam 465 keer in die media aangehaal en het ’n wisseltrofee en prysgeld vir sy kundige bydraes ontvang.

“Ek is baie dankbaar vir die erkenning. Soos met alle vorms van erkenning is daar altyd ’n span binne en buite die universiteit wat hierdie dinge moontlik maak en ek is baie dankbaar teenoor hulle.”

NWU-kundiges word dikwels aangehaal

Die NWU is trots op die uitmuntende gehalte van sy kundiges, wie se kennis ook deur die media waardeer word. Dit kan gesien word in die duisende vermeldings, onderhoude en aanhalings wat gereeld in koerante, die aanlyn media en op radio en televisie aan personeel toegeskryf word. In 2016 is ’n totaal van 2 419 media-items gepubliseer waarin NWU-kundiges aangehaal is of mee onderhoude gevoer is.

Die Woordvoerders van die Jaar-geleentheid beloon nie net toppresteerders nie, maar gee ook erkenning aan diegene wat huishoudelike name begin word, asook aan personeel wat die mediaruimte betree.