Eric Ntumba is ’n man met ’n missie: om verandering na die Afrika-vasteland te bring.

Sy plan van aksie? Om aktief deel te neem aan besprekings wat ’n verskil kan maak, om die meeste te maak van elke geleentheid wat sy pad kruis, om by sy gemeenskap betrokke te wees, en om nooit op te hou om nuwe kennis te verwerf nie.

 

Hierdie NWU-alumnus is die hoof van korporatiewe, privaat en diaspora bankdienste by die Procredit Bank in die Demokratiese Republiek van die Kongo.

 

Eric het in Julie hierdie jaar deelgeneem aan die Afrika-Frankryk-jongleiersprogram met die doel om hoëpotensiaal leierskap in Afrika en Frankryk te ontwikkel. Slegs 20 jong leiers is uit meer as 600 aansoekers vir die 2017-program gekies.

 

Die NWU & U het vir Eric in Parys opgespoor, waar hy van 3 tot 7 Julie aan die program deelgeneem het.

 

Wat beteken dit vir jou om vir hierdie leierskapsprogram gekies te word?

 

Ek voel baie klein. Om vir die program gekies te word, is nie net ’n erkenning van my professionele prestasierekord tot dusver nie, maar ook ’n erkenning van my volgehoue pogings om ’n kultuur van transformasie en diensleierskap te bevorder.

 

Jy het baie op hierdie relatief jong ouderdom van 34 vermag. Watter rol dink jy moet voortgesette leierskapsontwikkeling ten opsigte van jong professionele persone soos jyself vervul?

 

Ek sien leierskapsopleiding as absoluut noodsaaklik. Daarby glo ek uitnemendheid is ’n plig en nie ’n opsie nie. Deur my leierskapsvaardighede die hele tyd op te skerp, rus ek myself toe om ’n waarneembare verskil in die lewens van ander te maak, en om met gesag te praat vir diegene wat nie ’n stem het nie.

 

Wat is jou verwagtinge van die program?

 

Ek het in 2014 aan die inleidende program van die Mandela Washington Fellowship for Young African Leaders deelgeneem en ek sien daarna uit om ’n vergelykende ontleding van die twee leerprogramme te doen.

 

Ek is ook opgewonde oor die vooruitsig van eweknie-tot-eweknie-leer deur my interaksie met die ander afgevaardigdes.

 

"My grootste verwagting is om ’n netwerk te bou van jong, eendersdenkende leiers wat die storie van Afrika sal verander."Kyk as voorbeeld na my tuisland, die DRK. Die lewe in Kinshasa, die hoofstad, is wonderlik, maar dit word deur erge armoede en deur die huidige politieke onrus en onstabiliteit geteister.

 

Laasgenoemde word veroorsaak deur die poging van die uitgaande president om aan sy mag vas te klou ten spyte van ’n duidelike grondwetlike klousule wat ’n derde ampstermyn verbied.

 

Die situasie is gespanne en as ’n land hoop ons vir die beste, aangesien die DRK beter verdien. Kortom: Ek hoop ek sal in staat wees om netwerke te bou wat kan bydra tot die pogings om die streek te stabiliseer en laat groei.

 

Hoe behou jy ’n werk-lewe-balans?

 

Ek moet erken dat dit ’n uitdaging is, gegewe die feit dat ek aan die hoof staan van een van die vinnigsgroeiende besigheidsegmente van die organisasie waar ek werk. Dit het my amper twee jaar geneem om ’n korporatiewe bankafdeling in ’n finansiële diensverskaffer gevestig te kry wat voorheen slegs op kleinhandel, klein- en mediumorganisasie- (KMO-) bankwese en mikrofinansiering gefokus het. Ek het die eerste jaar ’n gemiddelde van 75 uur per week gewerk om die span en die kantoor op te bou.

 

Ek kry balans deur gedurende die week aan sport deel te neem en naweke tyd met my gesin deur te bring. Sondag is ons gesinsdag en ons maak die meeste daarvan deur nuwe plekke te besoek, op die Kongorivier te vaar, saam te eet of tennis te speel.

 

 

Kyk gerus na hierdie video oor die interaksie tydens die Afrika-Frankryk-program.