Prof Raymond Parsons van die NWU Besigheidskool het hierdie eerbewys op 24 Februarie in Worcester ontvang.

 

Hy het erkenning ontvang saam met ander prominente voormalige inwoners soos Nobelpryswenner vir letterkunde JM Coetzee, kultuur- en menseregtekampioen dr Danny Titus, legendariese sanger David Kramer, skrywer en digter Diana Ferrus, en wyle regter Thembile Skweyiya.

 

Dit het met ’n vraag begin

 

Om deur die mense van Worcester vereer te word, het spesiale betekenis vir Raymond, aangesien hy glo sy grootwordjare in dié dorp het sy lewe en sy loopbaan gevorm.

 

“Toe ek ’n jong seun van ongeveer 10 jaar oud was wat in die Wes-Kaap gewoon het, het my pa – wat ’n suksesvolle plaaslike sakeman en boer was – my op ’n besoek aan die plaaslike township saamgeneem.

 

“Toe ek so rondkyk, het ek vir hom gevra: ‘Hoekom is hierdie mense so arm?’ Hy het geantwoord: ‘Ek weet nie, jy moet ’n ekonoom wees om dit te kan verduidelik.’ ‘Wel,’ het ek blykbaar geantwoord, ‘dan wil ek ’n ekonoom word.’”

 

Dit was die oorsprong van sy lewenstaak. Hy het die grootste gedeelte van sy skoolloopbaan in Worcester deurgebring en sy hoërskoolloopbaan by Hoër Seunskool Worcester voltooi, waar hy die Maskew Miller-prys vir sy akademiese prestasie ontvang het. “Dit en my buitengewone onderwysers het aan my die selfvertroue gegee om my opvoeding voort te sit.” Hy het daarna ekonomie aan die universiteite van Kaapstad, Oxford en Kopenhagen bestudeer.

 

“Ek het baie geleer terwyl ek in Worcester gewoon het. Ek het byvoorbeeld geleer om volkome tweetalig te wees – ’n vaardigheid wat my uiteindelik na die NWU in Potchefstroom gelei het.”

 

Geskiedenis help jou om oplossings te vind

 

Nog ’n waardevolle les wat hy op skool geleer het, is die belangrikheid van hervorming en die skep van sosiale dialoog in ’n diverse samelewing.

 

“My geskiedenisonderwyser het daardie saadjies by my geplant. Ek het gou besef ’n mens kan nie die beste oplossings vir die toekoms identifiseer sonder ’n goeie kennis van die land se geskiedenis nie. Die leer van geskiedenis op skool het my op ’n pad geplaas wat my lewe en my loopbaan gevorm het – ’n pad wat nog nie klaar geloop is nie.”

 

Raymond sê as inwoner van Gauteng kan hy nie dikwels in Worcester gaan kuier nie. Die toekenningseremonie was dus vir hom ’n wonderlike geleentheid om nie net weer bande met die dorp en sy mense te smee nie, maar om hulle ook te bedank vir die rol wat hulle in sy lewe gespeel het.

 

* Die toekenningseremonie was deel van die Breede Vallei se gemeenskapsviering van die 200-jarige bestaan van die dorp Worcester sedert dit deur Lord Charles Somerset gestig is. Dié week lange fees het van 24 Februarie tot 1 Maart plaasgevind.