Hondegedragskundige Noleen Fourie sê hierdie gedrag kan met behulp van leerteorie reggestel word, sonder dat enige onaangename metodes of  toerusting gebruik word.

 

Steve se vrees is ’n algemene gedragsprobleem onder diere, sê sy. “Net soos mense vreessnellers soos hoogtes, openbare toesprake en selfs spinnekoppe het, het honde dit ook. Vir honde is die grootste vreessnellers donderweer, vuurwerke, harde geluide, reis, en alleen wees.”

 

Van tydskrifredakteur tot hondegedragsadviseur

 

Noleen, wat aan die hoof is van die Paws in the City-inisiatief, is ’n trotse alumna van die NWU se kampus in Vanderbijlpark, waar sy haar BA-graad en nagraadse onderwyssertifikaat verwerf het.

 

“Jy kan seker sê ek het die skilderagtige roete geneem tot waar ek vandag is,” lag Noleen. Langs die pad was sy onder andere ’n Afrikaans-onderwyser, ’n gemeenskapsjoernalis en redakteur van die AnimalTalk-tydskrif.

 

“Ek het van die begin af as koerantjoernalis in Vanderbijlpark tot die diere-sy van sake aangetrokke gevoel,” onthou Noleen. Dit het haar toegelaat om met verskillende rolspelers in die troeteldiersorgsektor kontak te maak, en sy het baie gou goeie insig in die sektor ontwikkel. Dit het  ongelukkig ook die talle uitdagings ingesluit, waaronder die mishandeling wat diere soms verduur.

 

Haar begeerte om meer prakties betrokke te raak, het al hoe groter geword en daarom het sy besluit om haar lewe aan honde te wy. Daardeur wil sy honde-eienaars bemagtig en tradisionele denkwyses en wanopvattings oor honde se gedrag uitdaag.

 

Wat doen ’n hondegedragskundige?

 

Noleen het haar opleiding onder Scotty Valadao – een van die land se voorste gedragskundiges – ontvang. Sy help honde-eienaars wie se diere gedragsprobleme toon, byvoorbeeld vrees, oor-opgewondenheid, vernielsug, pluk aan die leiband en toiletgewoontes.

 

“Die verandering van ’n hond se gedrag betrek ook sy emosies. Ek beskryf dit dikwels as terapie vir honde. Dit neem tyd, geduld en harde werk, maar dis altyd die moeite werd.”