Beste alumni

Dit kan baie skrikwekkend en terselfdertyd opwindend wees en kan nie vermy word nie. Dit vul ons met vrees en hoop, en is die pad na elke nuwe fase van ons lewens. Dit is ons “eerste dae”.

In hierdie uitgawe van die NWU & U kan julle meer lees oor die eerstejaarstudente se aankoms op ons kampusse – blinkoog jongmense wat ’n opwindende nuwe hoofstuk begin. Vir talle van hulle is dit die eerste keer dat hulle hul vlerke sprei en die nes verlaat. Ander is dalk die eerstes in hul families wat universiteit toe gaan.

Dit sal egter nie die laaste “eerste dag” wees waarvoor hulle te staan kom nie. Oor ’n paar jaar sal hulle ’n ander drumpel oorsteek – wanneer hulle vir die eerste keer begin werk.

Dit is die universiteit se verantwoordelikheid om hulle vir daardie dag voor te berei. Ons leer hulle nuwe vaardighede, slyp hul talente en wys hulle hoe om diversiteit te omarm en aanspreeklike burgers te word wat ’n hart vir maatskaplike geregtigheid het.

Op die agterblad van hierdie uitgawe kan julle sien hoe die Fakulteit Opvoedkunde hulle 2018-eerstejaarstudente tydens ʼn kamp vir werkgeïntegreerdeleer bemagtig het.

Julle, as ons alumni, kan by ons veldtog aansluit om ons studente te bemagtig. Julle kan dit doen deur jul kennis of jul ervaring van die werksomgewing met ons studente te deel, of deur te help om van ons NWU-projekte te befonds. As julle betrokke wil raak, is julle welkom om Izette Schouwstra, die afdelingshoof van die NWU se Alumnikantoor, by izette.schouwstra@nwu.ac.za te kontak.

Kom ons vat hande en rus die klas van 2019 toe sodat hulle hul “eerste dag” by die werk met vertroue en trots tegemoet kan gaan.

Lekker lees!

Nelia en die

NWU & U-span