As ons na die lewens van hierdie twee nuwe “doktore in die NWU-huis” kyk, dink ’n mens aan een van Mahatma Gandhi se gesegdes, wat lui: “Die beste manier om jouself te vind, is om jouself in diens van ander te verloor.”

 

Dit is presies wat die NWU se twee jongste ontvangers van eredoktorsgrade gedoen het. Regter Bess Nkabinde, wat haar eredoktorsgraad op 21Oktober 2021 ontvang het, het ’n buitengewone bydrae tot die regsberoep en tot maatskaplike geregtigheid in Suid-Afrika gelewer.

 

Dr Fraser-Moleketi is vir haar lewenslange werk in die samelewing en in die Suid-Afrikaanse politieke landskap vereer. Sy het haar graad op 19 November 2021 ontvang.

 

Rolmodel en regsgeleerde van formaat

 

NWU-alumnus regter Nkabinde is benoem deur die Fakulteit Regte, met wie sy noue bande het. Sy is nie net vir haar noemenswaardige bydrae tot ons land se regswetenskap benoem nie, maar ook omdat sy plaaslik en internasionaal ’n rolmodel vir baie mense is, veral vir vroue in die regsberoep.

 

Sy is in Januarie 2006 as regter van die Konstitusionele Hof aangestel. Sy het deur die jare gedien as waarnemende adjunkhoofregter en later as waarnemende hoofregter van die Republiek van Suid-Afrika, asook as waarnemende appèlregter in die Hooggeregshof van Namibië.

 

Regter Nkabinde is ook geen vreemdeling in die akademie nie. Sy het ’n BProc van die Universiteit van Zululand en ’n LLB van die Universiteit van Noordwes, en het al referate by nasionale en internasionale instellings gelewer. Sy het ook ’n inleidende kursus in Suid-Afrikaanse grondwetlike regswetenskap vir nagraadse studente by die Maryland Law School in die Verenigde State aangebied.

 

Maak die wêreld ’n beter plek

 

Dr Geraldine Fraser-Moleketi is deur die Fakulteit Geesteswetenskappe vir ’n eredoktorsgraad benoem.

Sy is ’n sterk voorstander van maatskaplike en ekonomiese transformasie in Suid-Afrika en Afrika en het ’n betekenisvolle rol gespeel in die veelparty-onderhandelings van die Konvensie vir ’n Demokratiese Suid-Afrika (KODESA), wat Suid-Afrika se grondwetlike demokrasie tot stand laat kom het.

 

Terwyl sy van 1999 tot 2008 as Minister van Staatsdiens en Administrasie gedien het, was een van haar prestasies die instelling van die kindertoelae. Sy het ook die idee van gemeenskapsontwikkelingswerkers bekendgestel as ’n poging om die gaping tussen die regering en benadeelde gemeenskappe te oorbrug.

 

Sy het ’n meestersgraad in administrasie van die Universiteit van Pretoria, en het ’n kwalifikasie in leierskap vir organisatoriese verandering by die Wharton-besigheidskool by die Universiteit van Pennsilvanië voltooi. Sy het ook ’n DPhil Honoris Causa van die Nelson Mandela Universiteit ontvang.

 

Hierdie twee voorbeelde – die een as bekende rolmodel in die regswêreld en die ander een wat die lewe van kwesbare mense verbeter – beklemtoon die wyse woorde van Mahatma Gandhi. Dit wil voorkom of jy inderdaad jou werklike doel bereik – en jouself vind – as jy as leier in die diens van ander jouself verloor.