Sceletium tortuosum kgotsa “Kougoed” ga e bolo go dirisiwa ke Ba-Khoisan go ralala dingwaga go alafa mathata a tlhaloganyo.
TOBETSA MO SETSHWANTSHONG GO BUISA GO FETA
Leungo la Marula ke lengwe la maungo a setso a Aforika le le tshwanetseng go akanyediwa go dirisediwa thibelo ya tlhaelo ya dijo. Leungo la Marula (Sclerocarya birrea) le ka bonwa kwa Niger, Burkina Faso, Benin le kwa Aforikaborwa.
TOBETSA MO SETSHWANTSHONG GO BUISA GO FETA
Tota e bile, yunibesiti ya rona – kwa Senthareng ya Ditsamaiso tsa Kitso ya Setso (Senthara ya IKS) – e lejwa e le yone e e simolotseng ditsamaiso tsa Kitso ya Setso ya Aforika mo Aforikaborwa.
Senthara ya rona ya IKS ya dirutwa di le mmalwa tse di kopantsweng , tsa mefuta e e farologaneng, e nna le seabe mo dirutweng tsa bolepadinaledi le tsa ditsamaiso tsa pholo go fitlha ka tsa temothuo le tsa thekenoloji, gareng ga tse dingwe. Mosola wa dimela tsa setso ke gore di re ruta ka dilo di le dintsi thata.
Ngaka Abiodun Olusola Omotayo, wa lefelo la patlisiso ka ga Go Nna teng ga Dijo le Tshireletso ya Tsone, o dira patlisiso ya go bona gore maungo a tlhago a Aforika a ka dirisiwa jang gore dijo di se tlhaele.
Kgonego ya gore semela sengwe sa setso se ka dirisediwa go alafa bothata jwa go tshwenyega thata mo tlhaloganyong ke selo se mankge mongwe wa YBB a batlang go dira patlisiso ka sone, e leng Ngaka Makhotso Lekhooa, motlhatlheledi-mogolo wa DST/NWU wa Go Tlhamiwa ga Melemo ya Kalafi Pele go Dirwa Dipatlisiso tsa Yone (Pre-Clinical Drug Development Platform [PCDDP]).
Khumo e e seng kana ka sepe ka ga kitso ya setso e e neng ya thusa go otla le go fodisa bagologolwane ba rona ka makgolokgolo a dingwaga, e anaanelwa thata ke YBB.
Semela seno se ka fedisa go tshwenyega thata mo tlhaloganyong ka bonako
Makhotso o dira patlisiso ka ga kgonego ya gore semela seno sa setso, Sceletium tortuosum, se ka dirisediwa go alafa bothata jwa go tshwenyega thata mo tlhaloganyong.
O tlhalosa gore se ile sa dirisiwa go ralala dingwaga-ngwaga ke Ba-Khoisan go alafa bothata jwa go tshwenyega thata mo tlhaloganyong, go fokotsa tlhobaelo, go tokafatsa tsela e ba ikutlwang ka yone le go tokafatsa kgono ya go tlhoma mogopolo mo sengweng.
Makhotso a re mo Aforika, dimela di le dintsi tse di dirisediwang mathata a tlhaloganyo – go akaretsa le Sceletium tortuosum – ga di na bosupi jo bo nonofileng jwa saense go tshegetsa dipolelo tsa gore di na le kalafi. O thusa go fetola seno. “Mo thutopatlisisong ya me, ke ile ka dirisa jini ya fa peba e na le tshwenyego mo tlhalogayong go sekaseka gore methamo e e farologaneng ya Sceletium tortuosum jaaka ya kalafi e le nngwe le/kgotsa dikalafi di le mmalwa tsa thibelo ya go tshwenyega thata mo tlhaloganyong e dira jang, gape ka sekaseka matshwao a boitshwaro le a mo mmeleng.”
Dipholo tse di bonweng mo patlisisong ya gagwe di tla bontsha gore a di kgona go alafa bothata jwa go tshwenyega thata mo tlhaloganyong.
Go tlamela ka bosupi jwa saense jwa tshireletsego le go atlega ga melemo e e dirilweng ka dimela tseno, go tsamaisana le leano la ka gale la tsa melemo ya kalafi la Mokgatlho wa Lefatshe Lotlhe wa Pholo (World Health Organization’s [WHO]) la 2014-2023.
Gape patlisiso ya ga Makhotso e maleba ka gonne WHO e supa gore 4,4% ya baagi ba lefatshe ka bophara ba na le bothata jwa go tshwenyega thata mo tlhaloganyong, mme mo Aforikaborwa, peresente eno e fitlha go 4,6%. (Fa e le gore o batla go buisa athikele yotlhe ka thutopatlisiso ya ga Makhotso, tobetsa fa.)
“Leroborobo la Covid-19 le nna le ditlamorago tse di sa siamang mo pholong le mo ikonoming ya lefatshe lotlhe, mme ka ntlha ya moo, go lebeletswe gore bothata jwa go tshwenyega thata mo tlhaloganyong bo gole,” go bolela jalo Ngaka Makhotso Lekhooa. O ne a dira patlisiso ka kgonego ya go dirisa Sceletium tortuosum kgotsa “Kougoed” go alafa bothata jwa go tshwenyega thata mo tlhaloganyong.
Patlisiso e nna le matswela
Ngaka Abiodun Olusola Omotayo, mmatlisisi wa lefelo la Go Nna teng ga Dijo le Tshireletso ya Tsone, a re go nna teng ga dijo mo isagweng mo kontinenteng ya Aforika go ka nna ga ikaega ka kgonego e e iseng go lekelediwe ya ditlhare tsa setso.
Olusola, mmogo le Mop Adeyemi Oladapo Aremu, yo le ene e leng wa lefapha la Go Nna teng ga Dijo le Tshireletso ya Tsone, o phasaladitse pampiri ya lekwalopaka le le buang ka matswela a magolo a seno, le le bidiwang Food and Energy Security. Athikele eno e tlotla ka mesola ya maungo a setso a Aforika le gore ke eng fa a tshwanetse go akanyediwa go dirisediwa thibelo ya tlhaelo ya dijo.
Olusola a re mongwe wa mekgwa e e tlhomologileng ya ditlhare tsa maungo a setso ke kgono ya one ya go tlamela ka dikotla tse di botlhokwa tse di ka tswang di bonwa sewelo mo dijong tse dingwe. Gape ka tlhago fela, maungo ano a setse a tlwaetse mmu o a golang mo go one le tlelaemete, e bile ga a utlwalelwe ke maemo a a sa siamang a bosa jaaka a ditlhare tse di jetsweng.
Patlisiso e ne e le ka ga ditlhare di le lesome tse di tlhophilweng tsa maungo mo dikgaolong tse di farologaneng tsa Aforika. Mo gare ga tsone, go ne go na le mowana wa Aforika, Mmupudu wa kwa Teransefala, setlhare sa naga sa loquat, kei-apple le mothata le marula.
“Re fitlhetse di na le dikhemikhale tse dintsi tse di sireletsang botshelo jwa setlhare (phytochemical) le dikotla tse ditlhare tsa maungo tse di tlhophilweng di nang le tsone, go akaretsa le faeba, diminerale, dikhabohaetereiti, diasiti tsa tlhago, mafura, diporoteine, aene, khalesiamo, makanesi, sodiamo, sinki le dibitamine,” o bolela jalo.
“Maungo a ditlhare tseno gape a ne a bontsha kgono ya go lwantsha thulaganyo ya go tlhakana ka dikhemikhale le okosijene, go bolaya ditshedi tse dinnye-nnye thata le go nna ga tsone le dithibela-thurugo.” (Tobetsa fa gore o buise go ya pele ka patlisiso ya gagwe.)