eish9_afr_voxpop

As jy ’n tweede weergawe van 2020 kon skep, hoe sou dit lyk? Wat sou jy in jou persoonlike en werkslewe anders doen? Dit is die vrae wat ons aan ’n paar van ons kollegas gevra het.

Kom ons kyk wat hulle te sê het.

Ons sal waarskynlik almal saamstem dat 2020 ’n jaar was soos wat ons nog nooit beleef het nie. Ons het hierdie jaar met mooi uitgewerkte planne begin, net om te sien dat die Covid-19-stoomroller die meeste daarvan plattrap.

Lenet Raath

Senior administratiewe assistent by Studente Akademiese Lewensiklus Administrasie, Mahikengkampus

Dit is in werklikheid die eerste jaar in ’n baie lang tyd dat ek veranderings aangebring het in die manier waarop ek leef, selfs al moes ek die uitdagings van die pandemie hanteer. Ek wens eintlik dat ek al verlede jaar hierdie veranderings gemaak het.

Ek het geleer om sekere situasies wat buite my beheer is, te aanvaar, en die beste te maak van wat ek kan met voortdurende gebed en vertroue op die Here. Ek het ook geleer dat ek ’n paar mense die hele tyd tevrede kan stel, en dat ek al die mense soms tevrede kan hou, maar ek kan nie al die mense die hele tyd tevrede stel nie.

Ek het ook besef ’n mens kan maar net oorgee en die goeie dinge in die lewe geniet. ’n Positiewe ingesteldheid soos hierdie beteken egter nie dat ’n mens die lewe se probleme moet ignoreer nie. Dit beteken net dat jy optimisties moet wees en die goeie dinge raaksien, eerder as om ’n pessimis te wees en op die slegte goed te konsentreer. Jou perspektief kan soms ’n geweldige verskil maak.

Tshepang Molale

Lektor in kommunikasie, Mahikengkampus

Ek dink vir die meeste van ons vereis hierdie soort vraag dat ons introspektief en retrospektief na ons lewens sal kyk met die doel om onsself te verbeter.

Hoewel dit noodsaaklik kan wees, glo ek egter dat ons onsself soms te hard oordeel en dat ons nie erkenning gee aan die positiewe dinge wat in ons lewens plaasgevind het nie.

In my geval was 2020 vervullend. Dit het my ruimte gegee om te groei, te oordeel aan die paar mylpale wat ek andersins nie sou bereik het as dié jaar anders was nie, en daarvoor is ek dankbaar.

Soos alle mense, is daar nog ’n paar dinge wat ek wens ek kon bereik het, maar in alle billikheid is die positiewe dinge baie meer as die negatiewe aspekte. Daarom voel ek bevoorreg dat my ervarings verloop het soos dit in hierdie jaar gebeur het.

Eve Scorgie

Uitvoerende persoonlike assistent, Dekaanskantoor, Fakulteit Teologie, Potchefstroomkampus

As ek 2020 kon oorhê, sou ek probeer het om elke dag meer liefde te betoon, en meer tyd en geld te bestee aan alles en almal wat vir my dierbaar is, of aan dié wat broos of haweloos is.

As ek ’n tweede kans kon kry, sou ek minder suinig met my tyd wees: Ek sou nie familiebesoeke, vakansies of persoonlike doelwitte uitstel nie. Ek sou elke dag ten volle leef sonder om onverantwoordelik te wees.

Ek sou meer oefen, en die natuur en die vars buitelug meer waardeer. Ek sou vir myself gesê het dis reg om soms nee te sê, en ek sou my rekenaar om 4 nm afgeskakel en opgehou werk het. Ek sou vir myself gesê het dis oukei as ek nie daarin slaag om alles gedoen te kry nie – en dat ek nie skuldig hoef te voel daaroor nie.

Indien moontlik, sou ek ook ’n voorraad sjokolade en wyn aanskaf – ja, ek gaan beslis met ’n wynversameling begin.

Prof Stefan Kruger

Navorser, WorkWell-navorsingseenheid, Potchefstroomkampus

Hoewel ek hierdie jaar baie gewig verloor het, moes ek meer vrugte en gesonde grane geëet het en minder rooivleis – en ek moes meer geoefen het.

’n Wonderlike idee sou wees om meer te reis. Dit sou gekeer het dat my brein na ’n outomatiese rat oorskakel wanneer ek gemaklik raak in my omgewing. Ek sou graag met my seun Estian oor verhoudings, gevoelens en ’n paar van my vrese en vreugdevolle ervarings in die lewe wou gesels het. Wel, daar is nog tyd …

Ek sou dit geniet het om met prof Dan Kgwadi oor ’n glas rooiwyn die beginsels van strategiese bestuur te bespreek, en die impak wat dit op die welstand van werknemers kan hê. Ek sou meer dikwels vir my “werksfamilie” by WorkWell gesê het dat ek hulle waardeer.

As finale gedagte – iets wat ek nie in 2020 kan verander nie, maar wat goed sou wees – as ek net nog een keer vir my oorlede vrou, Annalize, kon sê dat ek haar liefhet. My leuse vir 2020 is, “Geluk is nie ’n bestemming nie, maar ’n lewenswyse …”.

Jacob Simangu

Direkteur vir Studentelewe, Vanderbijlparkkampus

Ek sou graag die tweede weergawe van 2020 só daar laat uitsien: Die studente met akademiese uitdagings sou geakkommodeer en geïntegreer word en ’n spesiale voordeel gegee word om te vergoed vir die probleme wat hulle ervaar sodat hulle hul studies kan verbeter.

Ek sou graag ons studente se ouers na die kampus wou nooi en toesien dat die NWU-bestuur ons standpunt oor etiese sorg vir hul kinders deel en bevestig.

In my ideale 2020 sou ek baie daarvan gehou het dat studente aan al die vorms van gestruktureerde en ongestruktureerde ko-kurrikulêre aktiwiteite op die kampus en by die koshuise deelneem.

Prof Susan Coetzee-Van Rooy

Navorser, Verstaan en Verwerking van Taal in Komplekse Omgewings (UPSET), Vanderbijlparkkampus

As ek my ideale weergawe van 2020 kon skep, sou dit begin met ’n florerende ekonomie wat betekenisvolle werk verskaf wat al die mense in Suid-Afrika in staat stel om ’n waardige lewe te lei.

Tweede op my lys sou wees om gratis onderwys van ’n hoë gehalte vir alle leerders en studente in Suid-Afrika aan te bied. Naby aan my vorige wens sou die opgradering wees van alle skoolgeriewe om weg te doen met die skandelike situasie waar 300+ skole in Suid-Afrika nie lopende water het nie.

Laastens sou ek wou droom dat alle Suid-Afrikaners ten minste vier tale kan praat en verstaan sodat ons vermoëns en die geleenthede wat ons het om sterk verhoudings en samehorige gemeenskappe te bou, uitgebrei kan word.