Beste alumni

Die NWU bestaan danksy hulle, en al ons aktiwiteite sentreer om hulle. Hulle is ons kliënte met wie ons ’n lewenslange vennootskap sluit. Hulle is ons studente … en ons toekomstige alumni.

Die artikels in hierdie uitgawe van die NWU & U vertel baie oor studentwees in die algemeen, en NWU-studentwees in die besonder.

Die artikel oor Jacob Seboko, wat op die ouderdom van 79 as eerstejaarstudent ingeskryf het, wys vir ons dat jy nooit te oud is om te leer nie.

Die artikel “Akademici verdien dié eksterne erkenning” vertel die storie van toewyding en akademiese uitnemendheid. Hierdie bekroonde akademici, prof Elvis Fosso-Kankeu, prof Susan Visser, dr Aurelia Williams en dr Musawenkosi Saurombe, het hoëvlak- openbare erkenning vir hul harde werk ontvang. Dit maak hulle uitstaande rolmodelle vir die studente met wie hulle hul kundigheid deel.

By die NWU is dit egter nie net die intellek wat by die deel van kennis en hulpbronne betrokke is nie. Harte wat vol passie vir mense en gemeenskappe klop, speel ook ’n rol.

Dit blyk duidelik wanneer ’n mens die artikel lees oor hoe die personeellede van die alumnikantore op ons kampusse hul harte oopgemaak het en uitgereik het om die lewe vir skoolleerders makliker te maak.

Deur die meer as 250 gemeenskapsbetrokkenheidsaktiwiteite van die NWU gee ons aan ons studente geleenthede vir werkgeïntegreerde en diensleer, en wys ons hulle ook hoe om verantwoordelike burgers te word wat maatskaplike geregtigheid nastreef.

Ons vertrou dat wanneer ons studente die NWU verlaat, hulle die kennis wat hulle in ons klaskamers verwerf het, sal terugploeg om ’n beter Suid-Afrika en ’n beter wêreld vir almal te bou – net soos julle, ons alumni, elke dag steeds doen.

Lekker lees!

Nelia en die

NWU & U-span