Prof Susan Visser is die bestuurder vir akademiese toekennings in die kantoor van die adjunk-visekanseliers vir navorsing en innovasie en vir onderrig en leer. Sy sê sy waardeer die erkenning wat sy ontvang het vir haar bydrae om rekenmeesters op te lei en ook vir die navorsing wat sy deur die jare in die rekeningkundige wetenskap gedoen het.

’n Leeftyd van kundigheid deel

 

Met meer as 42 jaar se ervaring in die akademie, is dit geen verrassing dat prof Susan Visser ’n blywende indruk op interne sowel as eksterne belanghebbers gelaat het nie.

 

Haar leeftydprestasietoekenning van die SAAA erken haar uitmuntende bydrae tot die rekeningkundebedryf die afgelope vier dekades.

 

Vir Susan, ’n voormalige dekaan van die Fakulteit Ekonomiese en Bestuurswetenskappe, is dit nie vreemd om toekennings te ontvang nie. Tydens haar loopbaan het sy toekennings van verskillende organisasies ontvang vir haar bydrae tot onderrig en leer, asook navorsing, in die rekeningkundige wetenskappe. Vier was nasionale toekennings en een ʼn internasionale toekenning.

 

Susan het ses kwalifikasies aan die voormalige Potchefstroomse Universiteit vir Christelike Hoër Onderwys ontvang, en het haar hoogste kwalifikasie – ’n DCom in bestuursrekeningkunde en finansies – in 1983 behaal.

 

Dr Musawenkosi Saurombe het in die kategorie vir opvoedkunde uitgeblink. Sy sê sy voel nederig en geëerd dat haar pogings om ’n verskil in hierdie wêreld te maak, erkenning ontvang.

Harde werk word beloon

 

In 2017, toe dr Musawenkosi Saurombe op die ouderdom van 23 jaar haar graad aan die NWU behaal het, was sy die jongste vrou op die vasteland van Afrika om ’n PhD te verwerf.

 

Nadat sy haar doktorsgraad in bedryfsielkunde behaal het, het sy in 2017 as postdoktorale navorsingsgenoot by die universiteit aangesluit.

 

Sy het onlangs die pos van senior lektor aan die Universiteit van die Vrystaat aanvaar.