Ons het ons gradering met amper 100 plekke verbeter en van die 964ste tot die 869ste plek geklim. As gevolg hiervan is die NWU nou onder die top 4,8% van die beraamde 18 000 universiteite wat wêreldwyd geëvalueer word.

 

Ons bly op nommer sewe op die CWUR se ranglys van Suid-Afrikaanse universiteite, maar dit beteken nie dat ons stilgestaan het nie. Vergeleke met ander plaaslike universiteite het die NWU sy posisie verreweg die meeste verbeter.

 

Onderrig en fakulteitslede onder die vergrootglas

 

Die CWUR publiseer die enigste wêreldwye universiteitsranglys wat die gehalte van onderrig en opleiding van studente meet, asook die statuur van die fakulteitslede en die gehalte van hul navorsing. Anders as ander organisasies, baseer die CWUR nie sy gradering op data wat deur universiteite self ingelewer of deur opnames ingesamel word nie.

 

Die CWUR gebruik sewe objektiewe en kragtige maatstawwe om die wêreld se top-1 000 universiteite te gradeer:

 

Gehalte van onderrig, gemeet teen die getal alumni wat belangrike internasionale toekennings, pryse en medaljes gewen het, relatief tot die universiteit se grootte (gewig van 25%)

 

Indiensneming van alumni, gemeet teen die getal alumni wat HUB-poste in die wêreld se topmaatskappye beklee, relatief tot die universiteit se grootte (25%)

 

Gehalte van fakulteitslede/dosente, gemeet teen die getal akademici wat groot internasionale toekennings, pryse en medaljes gewen het (10%)

 

Navorsingsuitset, gemeet teen die totale getal navorsingsreferate (10%)

 

Hoëkwaliteitpublikasies, gemeet teen die getal navorsingsreferate wat in topvlak-vaktydskrifte verskyn (10%)

 

Invloed, gemeet teen die getal navorsingsreferate wat in hoogs invloedryke vaktydskrifte verskyn (10%)

 

Aanhalings, gemeet teen die getal navorsingsreferate wat dikwels aangehaal word (10%)