Ano e ne e le mafoko a Moatlhodi Edwin Cameron fa setlhopha sa baakatemi ba le 14 ba YBB le baithuti ba ne ba etetse Kgotlatshekelo ya Molaotheo.

 

Motlhokomedi wa lefelo la dipontsho la diatshe wa Kgotlatshekelo ya Molaotheo e leng Francois Lion-Cachet le Justice Cameron, yo o feditseng dingwaga di feta 10 e le Moatlhodi wa Kgotlatshekelo, o ne a tshwara kopano ya setlhopha ka di 27 Motsheganong 2019.

 

Setlhopha sa baithuti se ne se akaretsa baduladitulo ba baithuti ba LGBTIQ+ kwa YBB. Leeto leno, le le rulagantsweng ke Gender Benefit Network, le ne le akaretsa go bontshiwa moago wa Old Fort Prison, e balweladiphetogo ba le bantsi ba neng ba golegeletswe kwa go yone ka nako ya apareteiti, go bontshiwa phaposi ya kgotlatshekelo le go kokoanngwa ga diatshe.

 

Diatshe di ka nna 600 tse di kokoantsweng tsa Kgotlatshekelo ya Molaotheo di bontsha diatshe di le dintsi tse di dirilweng ke baseti le ke bataki bao tiro ya bone e leng ya morago ga motlha wa apareteiti.

 

Motlotlo o o kukang maikutlo

 

“Go engwa ka lefoko ke Moatlhodi Edwin Cameron le go tlotla le ene e ne e le tiragalo e e kukang maikutlo,” go bolela jalo Mop Robert Balfour, mothusa motlatsa-mokanseliri wa YBB wa go ithuta le go ruta, yo o neng a tlile le setlhopha.

 

Ka nako ya leeto leno, Moatlhodi Cameron o ne a ntsha pego ya ka fa ditshwanelo tsa batho ba LGBTIQ+ di neng tsa tlotlwa le go tlhomiwa ka gone mo Molaotheong wa Aforikaborwa. O ne a tlhalosa gape gore ntlha ya botlhokwa ya go dira gore batho ba ba itlhaolang jaaka ba LGBTIQ+ ke go tsaya kgato ya “go itshenola”, mme motho ke ene a itirelang tshwetso ya gore a o batla go itshenola kgotsa jang ka gonne go dira jalo go fetola botshelo jwa gagwe gotlhelele.

 

Moatlhodi Cameron o ne a akgolela yunibesiti go tshegetsa baithuti le badiri ka ditlhopha tse di jaaka Gender Benefit Network, e leng neteweke ya maloko a YBB a a tlamelang baithuti mo dikhamphaseng tse tharo ka madi le ka tshegetso e nngwe.

 

Go lwela tekatekano

 

Gape o ne a bua ka ntwa e e boima ya go lwela tekatekano. A re mo lefatsheng lotlhe, segolobogolo mo Aforika, go na le dikai tsa dinaga tse kwa go tsone kgatelelo, go kgerisiwa le go kgaphelwa kwa thoko ga batho ba ba robalanang le ba bong jwa bone go tsweledisetswang pele ke puso ka lefapha la yone la boatlhodi le ka mafapha a mangwe a puso. Seno se bonwa ka go dira ga yone gore mofuta ono wa thobalano o lejwe e le tlolomolao mme, gantsi, le ka go gatakela ditshwanelo tsa batho.

 

Leeto leno le ne la konelwa ka nako ya dipotso le dikarabo e ka yone Moatlhodi Cameron a neng a abela Robert buka e e bontshang go kokoanngwa ga diatshe tsa Kgotlatshekelo ya Molaotheo.

 

Buisa kgang yotlhe fa.