YBB e ipela ka patlisiso le tlhamosešwa ya yone, tse e leng dingwe tsa tse di gaisang tsotlhe mo Aforikaborwa. Ka 2018 re ne ra bona maduo a le matlhano a e ka tswang e le maduo a go naya tlhamosešwa dinaledi tse tlhano (gareng ga tse dingwe) mo tekanyetsong ya lefatshe ka bophara ya go tlhoma maduo ya Quacquarelli Symonds.

 

Ka 2017, setlamo sa tshekatsheko ya dipalopalo tsa dibuka tse di gatisitsweng sa Clarivate Analytics se ne sa tsenya YBB mo lenaaneng la diyunibesiti tsa ntlha tse di kwa godimo tse tlhano mo Aforikaborwa.

 

Ofisi ya TTIS e na le seabe se se botlhokwa sa go boloka maduo a YBB e nang le one a tlhamosešwa.

 

Selo sa botlhokwa ke go e sireletsa

 

YBB e amogetse dikabelokhuno tseno ka go eteletsa kwa pele mokgwa wa go sireletsa IP ya babatlisisi le ya batlhamasešwa ba yone. IP eno e akaretsa diphitlhelelo tsotlhe tsa patlisiso tse go gwebiwang ka tsone le dithekenoloji tse di ntšha tse yunibesiti le badiri ba yone ba di tlhamileng.

 

Boikaelelobogolo jwa ofisi ya TTIS ke go fetisetsa IP e e tlhamilweng ya yunibesiti go tswa mo YBB go ya kwa ditlamong tse di leng teng kgotsa kwa dikgwebong tse di sa ntseng di fatlhoga gore di e tlhame le go gweba ka yone. Gantsi seno se dirwa ka go rulaganyetsa go nna le laesense, gore go kgonege go gweba ka IP jaaka dikumo le ditirelo tse di ntšha.

 

Ofisi ya TTIS, e e eteletsweng pele ke mokaedi-mogolo wa yone e leng Ngaka Janine Chantson, yo e leng moporofešenale yo o kwadisitsweng yo o rutang thuto ya thekenoloji, le yone e tlhomamisa gore ga go gatakelwe Ditshwanelo tsa Semolao Tsa Dithoto tsa Molao wa Patlisiso le Tlhabololo tse Puso e di Tshegetsang ka Madi, Molao wa bo 51, wa ka 2008.

 

Setlhopha se ikemiseditse go thusa

 

“Setlhopha sa rona se na le baporofešenale ba ba katisitsweng le ba ba nang le maitemogelo ba ba thusang babatlisisi le batlhamasešwa ba yunibesiti ka ditirelo tse di farologaneng, ka boikaelelo jwa go tlhomamisa gore go rutwa ga thuto ya thekenoloji go a atlega,” Janine o bolela jalo.

 

“Tiro ya konokono ya TTIS e sa ntse e le kgobokanyo ya matlole a tlhabololo ya thekenoloji, a kgwebo le a tsamiso ya kgwebo, e bile ga jaanong jaana tiro ya konokono e YBB e e dirang e sa e kopanela le setlamo sepe se sengwe ya kgobokanyo ya matlole le yone e dirwa go tswa mo TTIS.”

 

Dikgang dingwe tsa go atlega ga YBB mo go tsa kgwebo di akaretsa Afriforte, Dithekenoloji tsa CFAM, Jonker Sailplanes, thekenoloji ya Pheroid, CText, dipompo tsa mogote (M-Tech), le Bogakolodi ka tsa TRADE.