Geagte alumni

Daar is iets magies aan Desember, en vir elkeen van ons tower dit verskillende heerlikhede op.

Vir sommige van ons herinner Desember ons aan die geur van ma se kos as ons tuiskom. Vir ander is dit sinoniem met die gevoel van warm seesand onder ons kaal voete, of aan die gelag van ons kinders of kleinkinders.

Talle mense kuier in Desember saam rondom tafels wat kreun onder vingerleklekker disse. Almal is egter nie so gelukkig nie.

Volgens die webwerf van die Verenigde Nasies se Voedsel- en Landbou-organisasie is daar meer as 820 miljoen mense wat elke dag honger ly. Dit is waarom alumnus Sydwell Sihlangu se sampioenprojek waarmee hy voedselsekerheid wil bevorder, so lofwaardig is.

Die feesseisoen is ook ’n tyd om te gee – aan diegene naby ons, en ook aan ander in nood.

Dit is waar die konsepte van “terugploeg” of “gee dit aan” so relevant is – iets wat ons alumni by die tuiskomsgeleentheid op die kampus in Vanderbijlpark gedemonstreer het. Hulle het tydens hierdie geleentheid geld ingesamel vir die kampus se Veertjiefonds, wat behoeftige studente help.

Nog ’n NWU-fonds vir studente wat sukkel om kop bo water te hou, is die nuwe Welstandsfonds vir Regstudente. Lees die artikel om uit te vind wat dit behels en hoe jy ’n bydrae tot hierdie verdienstelike saak kan lewer.

Hetsy jy die pad vat of tuisbly; vriende en familie besoek of na ’n stil plek wegvlug, geniet die magiese maand van Desember en bly veilig.

Tot volgende jaar,

Nelia en die

NWU & U-span