As gevolg van die beperkings op die grootte van byeenkomste, moes die getal gaste by die sakeontbyt in Pretoria beperk word. Die voordeel hiervan was dat die gaste en die NWU-afgevaardigdes by ’n intiemer gesprek betrokke kon wees.

 

Prof Daryl Balia, adjunk-visekanselier vir inligtingstegnologie en Potchefstroomkampusbedrywighede, het die gaste oor ontwikkelings by die universiteit ingelig, sy gedagtes oor die toekoms van die NWU gedeel, en befondsingsuitdagings in die hoëronderwyssektor bespreek. Bert Sorgdrager, die voorsitter van die NWU-Konvokasie, het die gaste uitgenooi om by die Konvokasie aan te sluit.

 

Dr Alistair Mokoena, die landdirekteur van Google Suid-Afrika, was een van die gaste, en wil baie graag by toekomstige ondernemings van die NWU betrokke raak.

 

Byeenkoms op die bof

 

Die Alumnikantoor het ook saam met die NWU-Sport en die Hoëprestasie-instituut op die Potchefstroomkampus aan die twee gholfdae deelgeneem.

Hulle het tydens ’n gholfdag by die Potchefstroomse dienssentrum op 28 Mei 2021 hulle stalletjie by die derde bof ingerig.

 

’n Paar dae later, op 4 Junie 2021, was hulle terug by die Potchefstroomse Buiteklub om aan ’n plaaslike kerk se gholfdag deel te neem. Met hulle stalletjie by die sesde bof, het hulle die gholfdag gebruik om van die gholfspelers beter te leer ken, die alumnihandelsmerk uit te bou en die alumnidatabasis uit te brei.

 

Personeel het drinkgoed, verversings en handelsmerkgeskenke uitgedeel. Met 88 gholfspelers wat op 28 Mei hulle stokke geswaai het, en 120 wat op 4 Junie deelgeneem het, het hierdie geleenthede ’n ideale kans gebied om betrekkinge met ons belanghebbers te bou.