Hierdie besoeke aan mediese geriewe in Mahikeng, Potchefstroom/Klerksdorp en Vanderbijlpark in Mei het saamgeval met internasionale Verpleegstersdag, wat op 12 Mei gevier word.

 

Alumnikantoor vat voor

 

Die Alumnikantoor was aan die spits van hierdie projek met die doel om vir verpleegkundiges te wys hoeveel hulle werk in die voorste linies waardeer word.

 

“Tydens verskeie kort byeenkomste met die hospitaalbestuur was dit duidelik dat verpleegkundiges geweldige druk en uitputting ervaar,” sê Nicolize van der Walt, afdelingshoof van die Alumnikantoor.

 

“Ons het Eagi saamgeneem om hulle ’n bietjie op te beur, met die hoop dat sy manewales hulle ’n paar minute lank kan help vergeet van siekte, lyding en dood.”Hulle besoeke is ook deur die goeie wense van prof Dan Kgwadi, NWU se visekanselier, vergesel.

 

“’n Spesiale woord van dank aan al die verpleegkundiges wat onverpoosd in die voorste linies werk. Bly asseblief veilig tydens hierdie pandemie,” het sy boodskap gelui.

 

’n Veertjie in ons hoed

 

Benewens dat hulle vir die gesondheid en welstand van NWU se studente, personeel en gemeenskappe verantwoordelik is, word die hospitale in die gebiede wat ons kampusse omring ook as opleidingsgeriewe vir ons verpleegkundestudente gebruik.

 

“Ons voel nederig wanneer ons die terugvoer van hierdie geriewe ontvang dat hulle ons studente se werksetiek, vaardighede en die gehalte van hulle werk waardeer,” sê Nicolize, en voeg by dat van die geriewe selfs gevra het dat daar meer studente vir praktiese ervaring by hulle geplaas word.

 

“Dit was ’n veertjie in ons hoed om te besef dat die NWU werklik verpleegkundiges en alumni van die hoogste gehalte lewer.”