Motlhatlheledi go tswa kwa Khamphaseng ya Mafikeng ya YBB o ne a gapa maemo a ntlha ka nako ya moletlo wa ngwaga le ngwaga wa yunibesiti wa Diawate tsa Setheo tsa Maemo a a kwa Godimo a go Ruta (Institutional Teaching Excellence Awards [ITEA]).

 

Ngaka Liqhwa Siziba wa Legoro la yuniti ya puisokwalo ya akatemi la Disaense tsa Mekgwa ya Batho le tsa Loago e ne e le mofenyi mo setlhopheng sa Awate e e Tlhomologileng ya Maemo a a kwa Godimo a go Ruta (Distinguished Teaching Excellence Award [DTEA]). Ke motlhatlheledi wa ntlha wa Khamphase ya Mafikeng go amogela kakgolo eno.

 

Moletlo wa diawate o ne o tshwerwe ka Labotlhano wa di 8 tsa Moranang ka nako ya moletlo wa dijo tsa maitseboa kwa Crista Galli kwa Potchefstroom.

 

Diawate di ne di abiwa ka ditlhopha* di le tharo, e leng sa Awate e Ntšha ya Maemo a a kwa Godimo a go Ruta (Emerging Teaching Excellence Award [ETEA]), Awate ya Tsela ya Maemo a a kwa Godimo a go Ruta (Teaching Excellence Award [TEA]) le Awate e e Tlhomologileng ya Maemo a a Kwa Godimo a go Ruta (DTEA).

Magoro ano a ne a ntshitse ga tshwene

Go ne go na le diawate di le 42 fa di feletse. Legoro le le tlhagisitseng bafenyi ba bantsi ke Legoro la Disaense tsa Ikonomi le Thekenoloji ya Tshedimosetso la Khamphase ya Khutlotharo ya Lekwa la bafenyi ba ba barataro, mme le latelwa ke Legoro la Khamphase ya Potchefstroom la Botsweretshi le Legoro la Disaense tsa Thuto la bafenyi ba le batlhano lengwe le lengwe la one.

 

Maikaelelo a diawate

Boikaelelo jwa diawate ke go akgola tiro ya boleng jo bo kwa godimo ya go ruta le go ithuta. Thulaganyo ya go tshwara diawate e tlhaola le go rotloetsa tsela ya go ruta ya tlhamosešwa le e e tlhomologileng e e dirwang mo dikhamphaseng tsotlhe tsa YBB. Diawate ke tsa go itumelela le go bontsha botlhe thuso e batlhatlheledi ba thusitseng baithuti ka yone.

 

Diawate tseno di abelwa go bontsha tebogo go batlhatlheledi ka ntlha ya boineelo jwa bone jwa go dira gore baithuti ba atlege gape di rotloetsa baakatemi go dira kgatelopele mo tirong ya go ruta le go ithuta.

 

Ditlhopha

Eno ke ngwaga ya bobedi e ka yone go abilweng diawate mo ditlhopheng tseno. Pholisi ya ITEA e ne ya tlhabololwa le go rebolwa ke Senete ka 2013. Thulaganyo e e tlhabolotsweng ya ITEA e ne ya tsenngwa tirisong ka 2014.

 

Diawate tse di Ntšha tsa Maemo a a kwa Godimo a go Ruta (ETEA) ke tsa go akgola batlhatlheledi ba ba magorogo-maša ka ntlha ya tsela ya bone ya maemo a a kwa godimo ya go ruta. Ke tsa go akgola batlhatlheledi ba ba ipeetseng mokgele wa nako e telele wa tiro ya bone ya boitshediso ya seporofešenale le tlhabololo ya yone ka go nna le bosupi jwa diphitlhelelo tse di tlhomologileng tsa mokgwa o moša wa go ruta le go ithuta mo tirong ya bone.

 

Awate ya Maemo a a kwa Godimo a go Ruta (TEA) e newa batlhatlheledi ba ba nang le bosupi jwa diphitlhelelo tse di tlhomologileng tsa maemo a a kwa godimo a go ruta. Ba dirisa mekgwa ya tlhamosešwa go tlhofofatsa tsela ya go ithuta e e rotloetsang baithuti le go ba gwetlha. Mokgwa wa bone wa go tlhatlhelela o rotloetsa go ruta dintlha tse di tseneletseng tsa serutwa o o felelang ka go ruta serutwa ka botlalo le go dirisa maano a a tlhofofatsang go ithuta, a a maleba le a a siametseng baithuti mo serutweng se ba se ithutang.

 

Awate e e Tlhomologileng ya Maemo a a kwa Godimo a go Ruta (DTEA) ke ya go akgola bakanoki ba ba tlhomologileng ba go ruta le go ithuta. Awate e akgolela batlhatlheledi boeteledipele le phitlhelelo ya go thusa baithuti ka madi a go ruta le go ithuta. DTEA e abiwa jaaka tsela ya go akgolelwa maemo a a kwa godimo mo setlhopheng sa TEA.

 

Ka fa batlhatlheledi ba tlhophiwang ka gone

Batsayakarolo mo diawateng ba tshwanetse go fitlhelela bobotlana 80% ya dipatlafalo mo ditlhopheng tse mongwe le mongwe wa bone a di tsenelang. Ba tshwanetse go romela photefolio e e bontshang bosupi jwa ditiro tsa bone tsa go ruta le go ithuta. Gape go elwa tlhoko bobotlana ditšhono di le pedi tsa go ithuta, mme ga go dirwe kitsiso ka e le nngwe ya tsone.

 

Go lebeletswe gore batsayakarolo mo diawateng tsa TEA ba neele dipuo kwa khonferenseng ya ngwaga le ngwaga ya khamphase kgotsa ya legoro la go ruta le go ithuta.

 

Diphotefolio tsa bone di ne di modereitiwa ke ditlhopha kgotsa ke diphanele tse maloko a tsone e leng baemedi ba Setheo sa Tlhabololothuto le Kemonokeng (Institutional Academic Development Support [ADS]) le bagakolodi ba go ruta ba ADS ba dikhamphase tse tharo tsa YBB.

 

Diphotefolio tse di nang le bosupi tsa bafenyi ba DTEA di modereitelwa mo teng ga setheo le kwa ntle ga setheo.