Anriëtte Pretorius is al amper 40 jaar lank bibliotekaresse by die Natuurwetenskappebiblioteek. “Dit is ʼn voorreg om te sien hoe studente van voorgraads na nagraads vorder met hulle studies. Party van hierdie studente word later kollegas.”
Siyabonga Zwana, ʼn tweedejaar BSc Fisiologie en Sielkunde-student, gebruik die toerusting wat in die Natuurwetenskappebiblioteek beskikbaar is.
<
>
Natuurwetenskappebiblioteek
Die NWU se Natuurwetenskappebiblioteek is op die boonste verdieping van gebou G1 op die Potchefstroomkampus geleë.
Dit is ʼn inligtingstoevlugsoord vir personeel en studente van die skole vir Chemiese Wetenskappe, Rekenaar-, Statistiese en Wiskundige Wetenskappe, en Farmasie, sowel as die Fakulteit Ingenieurswese.
Die biblioteek het ʼn groot studie-area en studente het maklike toegang tot alle handboeke en vaktydskrifte.
Voorgraadse en nagraadse studente, dosente en ander personeel kan altyd staatmaak op die vriendelike en doeltreffende personeel van dié biblioteek.
Die Musiekbiblioteek spog sedert 2014 met moderne meubels.
Studente het toegang tot ʼn groot versameling CD's en langspeelplate waarna hulle in die biblioteek kan luister. Volgens Retha Badenhorst, bibliotekaresse, is hulle veral trots op die ISAM-versameling van werke van Suid-Afrikaanse komponiste.
<
>
Musiekbiblioteek
Die NWU se Musiekbiblioteek is in die Skool vir Musiek en Konservatorium geleë. Dit voorsien in die behoeftes van studente, personeel en lede van musieksentrums in die omgewing.
Die biblioteek het ʼn uitgebreide versameling van ongeveer
40 000 items. Dit sluit boeke, tydskrifte, bladmusiek, CD's, DVD's en langspeelplate in.
Studente en personeel het toegang tot rekenaars, TV's en DVD-, CD- en platespelers. Die biblioteek is besonder trots op sy Inligtingsentrum vir Suid-Afrikaanse musiek (ISAM). Hierdie unieke versameling bevat werke deur Suid-Afrikaanse komponiste en die eerste werke in hierdie versameling dateer uit die vroeë vyftigerjare. Die versameling bevat ook meer onlangse werke deur jong komponiste.
Alle geregistreerde studente en personeel van die NWU mag van die biblioteek se dienste gebruik maak.
Die Jan Lion-Cachet-biblioteek huisves studiemateriaal, teksboeke, tydskrifte en koerante. Dit is ʼn veilige, studievriendelike omgewing waar studente navorsing kan doen en projekte kan aanpak.
Sydney Vos is een van die vriendelike bibliotekarisse wat studente en personeel by die Jan Lion-Cachet-biblioteek op die hoek van Molen- en Borcherdstraat in Potchefstroom bystaan.
<
>
Jan Lion-Cachet-biblioteek (Teologiese Biblioteek)
Die Jan Lion-Cachet-biblioteek beslaan die grootste gedeelte van die suidelike vleuel van die Teologiese Skool by die Gereformeerde Kerk Potchefstroom-Noord se gebou. Dit is vernoem na sy eerste bibliotekaris, prof Jan Lion-Cachet.
Die biblioteek is goed toegerus en bevat inligting en vakboeke oor al die vakke en vakgebiede binne teologie. Die biblioteek het ʼn groot versameling teologiese en historiese werke.
Studente het toegang tot verskeie moderne databasisse. Die biblioteek bedien die Teologiese Skool en die Fakulteit Teologie, sowel as predikante, studente van die Fakulteit Teologie se Oop Afstandsleersentrum en geakkrediteerde opleidingsinstansies.
Onderwysbiblioteek
Die Onderwysbiblioteek is die takbiblioteek van die Fakulteit Opvoedingswetenskappe op die Potchefstroomkampus. Die biblioteek bedien voor- en nagraadse studente sowel as die akademiese personeel van die fakulteit.
Dit het ongeveer 30 werkstasies waar studente hulself in projekte en navorsing kan verdiep. Vir groepwerk het die biblioteek ʼn spesiale vertrek bekend as die EduLab, wat deur die fakulteit self bestuur word. Hierdie vertrek is heeltemal klankdig sodat gebruikers in ander dele van die biblioteek nie gesteur word nie. Die vertrek het twee addisionele rekenaars met spesiale sagteware.
Die boekversameling is verdeel in boeke wat fokus op opvoedkundige wetenskappe en ʼn ander versameling met materiaal vir al die vakke wat op die vlak van basiese onderwys onderrig word.
Die biblioteek het ook ʼn groot versameling kinderliteratuur vir alle ouderdomme, van die heel kleintjies tot tieners.
Kirchner van Deventer, assistentbibliotekaris, sê die Onderwysbiblioteek se versameling kinderliteratuur sal binnekort uitgebrei word deur die byvoeging van die Ferdinand Postma-biblioteek se jeugliteratuurversameling.
Nadine van Heerden, ʼn vierdejaar BEd Tegniese student, is een van die Onderwysbiblioteek se gereelde kliënte.
<
>
Natuurwetenskappe
Musiek
Teologie
Onderwys
Die moderne hoofbiblioteke op elk van die NWU se drie kampusse maak voorsiening vir al die opvoedkundige behoeftes van personeel en studente. Afgesien van hierdie uitstekend toegeruste biblioteke het die NWU ook vier nisbiblioteke op die Potchefstroomkampus wat in die spesifieke inligtingsbehoeftes van onderwys-, musiek-, natuurwetenskap- en teologiese studente voldoen. Kyk saam met Eish! na hierdie vier spesiale biblioteke.
TERUG