Sammy Sepeng straal vreugde uit – suiwer, kinderlike vreugde soos sy aansteeklike glimlag dit weerspieël. Die 29-jarige is bésig: hy is gedurig in en uit by die Bemarking en Studentewerwing-afdeling op die Potchefstroomkampus, waar hy werk.
Hy doen dinge vinnig; vra gerus vir Olimpiese gouemedaljewenner, Caster Semenya, met wie hy in 2015 begin saamwerk het.
Maar Sammy het al lank voor Caster iets van Olimpiese glorie geweet. Hy is Hezekiél Sepeng se jonger broer, en onthou daardie wintersaand in 1996 toe sy broer 'n silwer in die 800 meter gewen het, baie goed.
“Dit was so 'n gelukkige dag,” sê Sammy, wat in Potchefstroom gebore en getoë is. “Ek was nog baie jonk, maar ek onthou dat die hele familie die item saam met ons kom kyk het. Toe my broer tot die eindrondte deurdring, het ek geweet enigiets is moontlik. Ons het die hele nag wakker gebly!”
“My broer, Zieks, is my rolmodel. Ek wou altyd soos hy wees, selfs vandag nog. Ons is baie na aan mekaar en gesels omtrent vier keer 'n week.”
Uit die blokke uit
Vir Sammy het dit het alles in 2013 begin, toe hy Europese atlete met hul treetempo ("pacing") begin help het onder leiding van Jean Verster, bestuurder van die NWU se Hoëprestasie-instituut vir Sport (HPI) in Potchefstroom en Caster se hoofafrigter.
Op daardie stadium het Sammy saam met Nigel Amos, die middelafstandatleet van Botswana wat by die 2012 Olimpiese Spele in Londen 'n silwermedalje gewen het, gewerk. In 2015 het Caster Sammy genader om haar met haar treetempo te help. Haar loopbaan het op daardie stadium 'n laagtepunt bereik, maar hulle het saam vir haar doelwitte gestel en besluit om hulself tot die uiterste te druk om Caster weer eerste oor die wenstreep te laat nael.
Uit die blokke uit
Die volgende stap
Die volgende stap
Zieks het hom oortuig om in sy spore te volg, en sy vertroue in Sammy was nie verniet nie. Sammy is 'n buitengewoon goeie sokkerspeler en atleet (veral in die 400 meter) met junior nasionale kleure in beide sportsoorte.
En toe, in Augustus verlede jaar, het hy weer die euforie van sy broer se Olimpiese sukses gesmaak toe 'n sekere goue meisie die wedloop van haar lewe in Rio de Janeiro gehardloop het en 'n glimmende goud in die 800 meter gewen het.
“Toe ek die eindrondte kyk en Caster daai laaste 100 meter sien hardloop... Ek sukkel om te beskryf wat ek gevoel het. Al die beplanning wat dit geverg het – dit was soos 'n droom wat waar geword het.”
Gaan vir goud
“Ek wou Caster nie onder onnodige druk plaas nie, want sy het reeds genoeg daarvan gehad. Ek het vir haar gesê ons moet ten minste vooruit beweeg, nie terug nie. Sy het reeds 'n Olimpiese silwer in die sak gehad, so ons het geweet waarvoor om te mik. Ons het vertroue en geloof in mekaar gehad en sy het haar allerbeste gegee. Caster is so 'n gawe mens met soveel toewyding,” sê hy met gevoel.
Sammy bly so beskeie soos altyd. “Ek leer nog, en dis baie lekker om met atlete soos Caster en Nigel te werk. Maar dis my droom om jong atlete af te rig en hulle in supersterre te verander. Ek wil 'n baie goeie afrigter wees, soos Jean. Dit is 'n ongelooflike ervaring om saam met hom te werk en by iemand soos hy te kan leer. Ek hoort by die universiteit en Bemarking en Studentewerwing is my tuiste. Ek is mal oor my werk en ek is nooit verveeld nie, want ek ontmoet baie mense en leer heeltyd meer oor bemarking.”
Sammy is getroud met Alinah en hulle het twee seuns – Thato is sewe, en Mzamo is 10 maande oud. “Daar is vir my niks lekkerder as om met my seuns te speel en in my vrou se geselskap te wees nie. Sonder hulle sou ek nie kon wees waar ek vandag is nie.” Nog 'n vreugde is om met sy kar te peuter. “Ek is doodgelukkig as ek my motor se enjin kan uithaal en die ringe kan vervang.” Inderdaad. As daar nou een ding is wat Sammy Sepeng goed doen, is dit om iets vir langer, vinniger en met meer krag te laat loop (of hardloop).