Personeellede doen ekstra moeite
Die NWU het toegewyde personeel wat gereeld die tweede myl loop. In Eish! se gereelde tweedemyl-reeks gee ons erkenning aan kollegas wat meer doen as wat verwag word.
James Botha
Willemien Botha, administratiewe beampte van Institusionele Regsdienste, sê James Botha, waarnemende direkteur van en senior regsadviseur in hierdie departement, verdien erkenning vir al sy harde werk. “Hy is buitengewoon toegewyd en het altyd tyd vir ander mense.” Sy sê hy lê gereeld die tweede myl af. “Die aard van sy werk beteken dat hy gereeld onder geweldige druk verkeer, maar hy ruim steeds tyd in vir sy betrokkenheid by ander organisasies, soos die pensioenfonds, Universities South Africa, en sy voorsitterskap van die Cherenkov Teleskopiese Rangskikking.”
Willemien sê James is 'n inspirasie. “Wanneer hy nie werk nie, is hy 'n kranige atleet wat al baie marathons en atletiekkompetisies voltooi het, waaronder die Comrades, Midmar en Twee Oseane. Hy oefen tans vir die Cape Epic-marathon.”
Sy sê James is 'n wonderlike voorbeeld van 'n personeellid wat eties, energiek en sorgsaam is. “Hy is ook 'n toegewyde pa en beslis iemand waarop die NWU trots kan wees.”
Christi Bester
Prof Elda de Waal van die Edu-HRight-navorsingseenheid op die Potchefstroomkampus sê Christi Bester, administratiewe assistent vir finansies in die Fakulteit Opvoedingswetenskappe, is altyd bereid om haar met enige rekenaarprobleme te help. “As nuut aangestelde personeellid het ek al 'n hele paar rekenaarverwante dilemmas ervaar, maar Christi help elke keer met toewyding en vriendelikheid.”
Elda sê kollegas soos Christi hou die glimlag op haar gesig.
Chimone Barends, Dassie Janse van Vuuren en Johan Schoeman
Studiegidse is noodsaaklik vir alle studente, en Anita Stapelberg, bestuurder van die Studiegidsverspreidingsentum op die Potchefstroomkampus, sê drie mense by die Institusionele Kantoor se besondere toewyding maak 'n groot verskil.
Hulle is Chimone Barends, senior opleidings- en ondersteuningsbeampte, en Johan Schoeman, stelselspesialis – beide van Kuali Finansiële Dienste – en Dassie Janse van Vuuren, besigheidsanalis van IT Besigheidsontwikkeling en Ondersteuning. Saam verseker hulle dat alle elektroniese kinkels wat die verspreidingsentrum van tyd tot tyd teister, uitgestryk word.
“Al drie help op kort kennisgewing en hul toewyding maak ons werk die moeite werd. Ons is baie dankbaar vir hulle bereidheid om die tweede myl te loop,” sê Anita.
Indien jy 'n kollega wil nomineer wat nooit skroom om ekstra moeite te doen nie, stuur asseblief 'n e-pos aan willie.duplessis@nwu.ac.za. Onthou om jou postitel en die naam van jou departement of skool, sowel as dié van die persoon wat jy nomineer, by te voeg. Gee ook redes waarom jy dink die persoon die tweede myl loop.
