Maloko ano a badiri a dira go feta tiro ya one
YBB e na le badiri ba ba ineetseng ba ka gale ba dirang tiro e e fetang e e lebeletsweng mo go bone. Mo athikeleng eno ya motseletsele wa go sa ipone tsapa ya Eish!, re akgola badiri-ka-rona ba ba tlisang diphetogo mo matshelong a batho ba bangwe.
Christi Bester
Ke go kgotlhelela le go ineela ga ga Christi Bester, motlhankedi wa tsamaiso ya tsa ditšhelete wa legoro la Thuto mo Khamphaseng ya Potchefstroom, yo o kgatlhang thata Mop Josef de Beer, moporofesa wa mmatlisisi wa Sekolo sa Disaense tsa Tlhago le Thekenoloji ya Thuto."Fa moithuti wa morago ga kalogo ya gerata ya bongaka yo o neng a etile go tswa kwa USA a ne a nna le mathata ka khomphiutha e a neng a tshwanetse go dira ka yone, Christi o ne a lemoga gore khomphiutha e ne e ise e felelwe ke nako ya go baakanngwa mahala. Le fa go ntse jalo, setheo sa dikhomphutara se ne sa ganana le ntlha eo mme sa re go e baakanya go tla ja R8 000. Christi o ne a se ka a amogela seo mme a tsaya ditokomane tse di tlhokegang le kgakololo ya semolao. Kwa bokhutlog, khomphiutha e ne ya baakanngwa mahala."
Sonette Spangenberg
Ngaka Diana Viljoen le ene o umaka thuso ya ga Sonette Spangenberg, motlhankedi yo o dirang manaanethalo le disekejulu, yo o tshwanelwang ke go akgolelwa go bo ka metlha a iketleeleditse go thusa ka mathata ape a a amanang le manaanethalo.
"O tlhama leano ka bonako go re thusa ka tsa phaposiborutelo le ka mafelo a bonno."
Mari-lize van Zyl, Lebohang Motaung, Nombulelo Kumalo, Junior Mthimkhulu
Mandi Wallace, mmenejara wa Senthara ya Thulaganyo ya go Tswelela Pele ka go Tlhabolola Porofešene (Center for Continuing Professional Development [CCPD]), o tlhopha setlhopha sa CCPD se maloko a sone e leng Nombulelo Kumalo, motlhankedi wa tsa ditšhelete, Lebohang Motaung, motlhankedi wa tsamaiso, Junior Mthimkhulu, motlhankedi wa go maketa, le Mari-lize van Zyl, motlhankedi wa tsa tsamaiso, ka ntlha ya tiro ya bone e e molemo e ba e dirang.
"Re lefapha le lennye le le tsenyang lotseno lo logolo lwa madi ka go ruta dikhoso tsotlhe tse di khutshwane mo Khamphaseng ya Khutlotharo ya Lekwa. Setlhopha sa me se sennye se tlhama tiro e e seng kana ka sepe." Mandi a re ba ineetse ka botlalo e bile ga ba ipone tsapa go thusa ba bangwe ka ditiro tsa bone. "Ga ke ise ke kopane le setlhopha se se tlhagafetseng jaana se se iketleeleditseng go thusa ka dinako tsotlhe le go dira sotlhe seo se ka se kgonang go tsenya porojeke tirisong."
Bertus le Roux
Go tsaya kgato ka bonako le go akanyetsa ba bangwe ga ga Ngaka Bertus le Roux, mmenejara wa tsamaiso ya di dikirii tse di kwa godimo le diketekomeletlo mo Khamphaseng ya Potchefstroom, go ne ga felela ka gore YBB e somarele bokana ka R30 000 go tswa go kopo-tlhwatlhwa ya ntlha fa maemo a ikonomi a lefatshe lotlhe a ne a utlwa manokonoko a Brexit (tshwetso ya United Kingdom ya go ikgogela morago mo European Union).
Rudi van der Merwe, mookamedi wa porojeke ya go rutwa ga thekenoloji le go nna le seabe mo baaging wa Ofisi ya Setheo, o akgola Bertus go bo a ile a emela nako e e siameng ya thulaganyo e ntšha ya go bona ditifikeiti tsa di dikirii go tswa go motlamela ka tsone kwa UK gore re solegelwe molemo ke go wela tlase morago ga moo ga kelo-kananyo morago ga dipholo tsa referentamo ya UK
Martie Esterhuizen
Ngaka Diana Viljoen, modulasetulo wa serutwa wa go laola kgonagalo ya go nna le ditatlhegelo tsa madi le motlhatlheledi-mogolo kwa Sekolong sa Disaense tsa Ikonomi mo Khamphaseng ya Khutlotharo ya Lekwa, a re Martie Esterhuizen, yo e leng tlhogo ya mo laeboraring ya khamphase, ke modiri wa dikgakgamatso wa mmatota.
"Bopelotelele jwa gagwe ke jo bo tswang pelong. O kgona go bona diathikele tse ke neng ke se kitla ke kgona go di bona. Martie o araba potso nngwe le nngwe e re e botsang go sa kgathalasege gore a e nngwe ka letsatsi kgotsa di 10."
Beula de Beer
"Morago ga malatsi a khunologo a dikgwedi di le nne le halofo tsa morago ga go tshola ngwana ke ne ka kgona go tla tirong le go dira kwa ntle ga gore ke rarabolole mathata pele." Reinette Koekemoer, motlhankedi-mogolo wa tsamaiso wa Sekolo sa Disaense tsa Tlhago le Thekenoloji ya Thuto wa Khamphase ya Potchefstroom, a re Beula de Beer, motlhankedi-mogolo wa tsamaiso, o ne a dira ditiro tsotlhe tsa gagwe tsa letsatsi le letsatsi ka nako ya fa a ne a seyo
"O dirile tiro eno le ya gagwe kwa ntle ga go thuswa ke ope. Ga a ke a ngongorego ka bontsi jwa tiro e e oketsegileng mme o tswelela ka tiro ya gagwe ka boitumelo."
Fa o batla go tlhopha modiri-ka-wena yo gantsi a sa iponeng tsapa go thusa ba bangwe, tsweetswee romela imeile kwa go willie.duplessis@nwu.ac.za. . Gakologelwa go supa maemo a gago a tiro le leina la lefapha la gago kgotsa sekolo sa gago, le tsa motho yo o mo tlhophang. Gape ntsha mabaka a gore ke eng fa o akanya gore motho yoo ga a ipone tsapa go thusa ba bangwe.